Translate

5/13/2013

"EYE OPENER" நிகழ்ச்சிகள்

பதிவு எழுத துவங்கிய காலத்தில் எழுதுவதற்கு பழைய விஷயங்கள் நிறைந்து கிடந்ததால் எதை எழுதுவது என்பதைப் பற்றி யோசிப்பதற்கு நேரம் அதிகம் விரயமாகும், இப்போது நடப்பு விஷயங்கள் ஏராளம் எழுத இருகின்ற சமயத்திலும் அதே பிரச்சினைதான் எதை எழுதுவது என்பது பற்றிய குழப்பம், புத்தகங்களை படிப்பதில் இருக்கின்ற ஆர்வம் செய்திகளை அறிந்து கொள்வதில் தாகம் அதிகம் இருப்பதால் எழுதுவதற்கு, குறிப்பாக பதிவு  எழுதுவதற்கு நேரம் கிடைப்பதில்லை. பதிவெழுதி பல நாட்கள் சென்று விட்ட நிலையில் இதை பதிவு செய்தே ஆக வேண்டும் என்கின்ற உந்துதலை ஏற்ப்படுத்தியது நேற்றைய "நீயா நானா" விஜெய் தொலைக்காட்சி நிகழ்ச்சி. பெரும்பாலான நீயா நானா நிகழ்ச்சிகள் முக்கியத்துவம் உடையதாக சமுதாய உணர்வுகளை பகிர்ந்து கொள்வதாக இருந்தது என்பதில் மாற்று கருத்து இருக்க இயலாது என்றாலும் நேற்றைய நீயா நானா இன்றைய சூழலில் அரசியலை பற்றிய புரிதலை இளைஞர்கள் எவ்வாறு புறக்கணிக்கின்றனர் என்பதை பற்றியும் இளைஞர்கள் இன்றைய அரசியலுக்கு எந்த அளவிற்கு மிகவும் அவசியமானவர்கள் என்பதை எடுத்து காண்பிக்கின்ற மிகவும் அருமையான நிகழ்ச்சி என்பதை என்னைப் போன்ற பெரும்பாலானோர் ஏற்றுக் கொண்டிருப்பார்கள் என்று நான் நம்புகிறேன்.

அரசியலை புறக்கணிப்பதால் ஏற்ப்படுகின்ற அவலங்களை இன்றைய இளைஞர்கள் அவசரமாக அறிந்து கொள்ள வேண்டும் காலம் தாழ்த்தி செயல் பட்டால் நாட்டிற்கு ஏற்படும் இழப்புகள் தனிமனித வாழ்க்கையில் எவ்வித பாதிப்புகளை உண்டாக்கும் என்று அறிந்திரா விட்டால், தனி மனிதனாக  எத்தனை சம்பாத்திதாலும் அதற்குரிய பலனை அடைய விடாமல் பொருளாதாரம், சுகாதாரம் தேச பரிபாலனம் போன்ற மிகவும் முக்கியமான இலாகாக்கள் பலவீனம் அடைந்து பின்னர் அழிவை மேற்கொள்ளும் அபாயம் இருப்பதை நாம் உணர்ந்து செயல்பட வேண்டும் என்பதை இளைஞர்களுக்கு எடுத்து காட்டுவதாக அமைந்தது. அரசியல் என்பதை "சாக்கடை" என்று ஒதுக்கி சென்றால், அதன் பின் விளைவுகளை ஒட்டு மொத்த நாடு அனுபவிக்கின்ற அவல நிலை உண்டாகும் என்பதை எடுத்து காட்டியது சிறப்பானது. இன்றைய இளைஞர்களுக்கு மேடை பேச்சுகளை கேட்பதற்கு ஆர்வம் கிடையாது, அரசியல் பற்றி அறிந்து கொள்ள நேரம் கிடைப்பதில்லை, மிஞ்சிப்போனால் விட்ட குறை தொட்ட குறையாக ஊடக வாயிலாக அரைகுறையான அரசியல் விவரங்களை அறிந்து கொண்டு கட்சிகள் மீதும் அரசியல் தலைவர்கள் மீதும் வசைபாடிக்கொண்டு, இன்னும் கொஞ்சம் மேலே சென்று முக புத்தகத்தில் "தத்து பித்தென்று" வசைபாடிவிட்டு அத்துடன் முடிந்தது அரசியல் என்று வாழ்க்கையை தொடரும் இளைஞர்கள், 

நாமும் நமது நாடும் சுகம் பெற அரசியலை பற்றி எங்கிருந்து அறிந்து கொள்வது எப்படி தெரிந்து கொள்ள வேண்டும் என்பதை உணராமல் "கண்டதே காட்சி, கொண்டதே கோலம்" என்று இளைஞர்கள் செயல்படுவது இந்திய தேசத்தை உலக வரைபடத்தில் காணாமல் போக செய்துவிடும் என்பதை உணரவேண்டும். இளைஞர்கள் அதிகம் கொண்ட இந்திய தேசத்தின் பலம் இளைஞர்கள் என்பதால் இது போன்ற "EYE OPENER" நிகழ்ச்சிகள் மூலம் ஒரு சிலராவது இதன் முக்கியத்துவத்தை உணர்ந்தால் இந்திய அரசியலில் பெரும் சாதனைகள் நிகழும் என்பதில் சந்தேகம் இல்லை