Translate

2/23/2013

கடவுள் ஏன் கல்லானான் ....மனம் கல்லாய் போன மனிதர்களாலே

நாடாளுமன்றத்தை நடத்த விடாமல் கோஷங்களை எழுப்பும் எதிர் கட்சியின் கோரிக்கைகளை ஆளும் கட்சி எப்படி சமாளித்து வருகிறது என்பதை தினமும் அந்த காட்சிகளை தொலைகாட்சியில் தவறாமல் பார்த்து கொண்டிருக்கும் அனைவருக்கும் தெரிந்ததுதான். மத்தியில் ஆட்சி செய்கின்ற அரசை எப்படியெல்லாம் முடக்குவது என்கின்ற ஒரே நோக்கத்துடன் செயல்பட்டு கொண்டிருக்கும் எதிர்கட்சியின் கொள்கையை பற்றி சொல்லி தெரிந்து கொள்ள வேண்டிய அவசியம் இல்லை. காங்கிரஸ் கட்ச்சிக்கென்று உள்ள அடிப்படை கொள்கையில் இருந்து விலகாமல் ஆட்சி செய்வதற்கு தடை விதித்துவருகின்ற மதவாத எதிர் கட்சிகளின் ஒட்டு மொத்த கொள்கை என்ன, குறிப்பிட்ட ஒரு மதத்தை சார்ந்தவர்களுக்கு மட்டுமே இந்திய தேசம் சொந்தம் என்பதா, ஆனால் அவ்வாறு இல்லை என்று சொல்லி கொண்டு ஆட்சியிலிருக்கும் காங்கிரசை ஆட்சி நடத்த விடாமல் இடையுறு செய்து கொண்டு பிரதமரை பதவி விலக சொல்லி வற்புறுத்தும் நோக்கம் என்ன, இந்திய தேசம் மதவாத அமைப்புகளை அங்கீகரிக்கிறதா, அப்படியானால் எந்த மதத்தை சார்ந்தவர்  ஆட்சியில் அமர செய்து ஆட்சி நடத்தும் நோக்கம் அவர்களுக்கு இருக்கிறது என்பதை அவர்கள் கோஷங்களும் எதிர்ப்புகளும் நமக்கு எடுத்து காட்டவில்லையா.

மத்தியில் ஆட்சியிலிருக்கும் ஆட்சியை கவிழ்க்கும் நோக்கம் நிறைவேறாத நிலையில் ஊழல் புகார்களை முன்னிறுத்தி குற்றவாளிகளை கண்டு பிடித்த எதிர்க்கட்சி, தங்களது கட்சியிலேயே ஊழல் இருப்பதை காண தவறியது, பின்னர் சுதாரித்துக் கொண்டு ஊழலற்ற உறுப்பினர்களை கொண்டது தங்கள் கட்சி என்ற நல்ல பெயரை எப்படியாவது தக்க வைத்து கொள்ள பெரும்பாடுபட்டு சிலரை கட்சியிலிருந்து வேறு வழியின்றி நீக்கியது மட்டுமே மிச்சம். தேர்தலில் எதை சொல்லி மக்களிடம் ஓட்டு கேட்பது என்பது பெரும் சாவாலாக இருக்கின்ற நிலையில், நடுவன் அரசை மிரட்டி, நாடாளுமன்றத்தை நடத்த விடாமல் முடக்கி, பிடிவாதம் பிடித்து, அப்சலுக்கு ஒரு வழியாக தூக்கு தண்டனை நிறைவேற்றி விட்டது. எப்படியாவது தங்களது கொள்கையை நிறைவேற்றி வருகின்ற மதவாத கட்சிகள் நாட்டில் அமைதி நிலவுவதை ஒருபோதும் பொருத்து கொள்வது இல்லை.

நாட்டை போர்களமாக்கும் ஒரே நோக்கம் கொண்ட மதவாத கட்சிக்கு நடுவன் அரசு ஒருபோதும் அடிபணியக் கூடாது. மதசார்பற்ற கொள்கைக்கு இடையுறாக போராடும் கயவர்களை புகலிடமாக கொண்டதாக பாராளுமன்றம் மாறிவிட்டால் மக்கள் நிலைமை என்னவாகும், 'சும்மா கிடந்த சங்கை ஊதி கெடுத்த' கதைதான். பழிக்குப் பழி என்ற நிலை ஏற்பட்டால் அதில் துயர் அடைபவர்கள் அப்பாவி பொதுமக்கள், மதவாதத்தை தூண்டி விடும் "நல்ல" மனிதர்கள் சுகமாக வாழ்ந்து கொண்டிருக்குக்க சம்பந்தமே இல்லாத யாரோ பலி கடாவாக்கப்படும் அநியாயம் நிறுத்த இயலாத தொடர்கதையாகிவிடும். 

2/20/2013

நிரந்தர கேள்வி மட்டும்

நாங்கள் குடும்பத்துடன் வளைகுடா நாடு ஒன்றில் சில ஆண்டுகள் வசித்து வந்தோம், என் கணவரின் உடன் பணி புரிந்து வந்த சிங்களவர் சிலருடன் பழகும் வாய்ப்பு கிடைத்தது, அப்போது ராஜீவ் காந்தி அவர்கள் கொலை செய்யப்படவில்லை, புலிகள் அமைப்பை தடை செய்யப்பட்ட இயக்கமாக அறிவிக்கப்படவில்லை, அப்படிப்பட்ட காலத்தில் அங்கிருந்த சிங்களர்களுக்கு தமிழர்களாகிய எங்களை சற்றும் பிடிக்காமல் பல முறை பல வஞ்சகமான சதித்திட்டங்களை தீட்டி பணியிலிருந்து துரத்த முயன்று தோல்வியடைந்தனர். அப்போது எங்களுக்கு அவர்களின் வன்மத்திர்க்கும் வஞ்சக செயல்களுக்கும் காரணம் தெரிந்திருக்கவில்லை. இலங்கையில் எப்போதும் சண்டை நடக்கிறது என்பதும் அதனால் பலர் உயிர், மற்றும் உடமைகளை இழந்து அகதிகளாக இந்தியா திரும்புகின்றனர் என்பதை செய்திதாள்களில் படித்திருக்கிறேன். அதன் தீவிரம் என்ன என்பது தெரிந்துகொள்ள தற்போதைய இணையதள வசதிகள் ஊடகங்கள் போன்ற பல்வேறு வசதிகள் அப்போது இல்லை. அக்காலத்தில் பர்மாவிலிருந்து வந்த அகதிகளைப்பற்றிய செய்திகள் சிலவற்றை எங்கள் பெற்றோர் பேசுவதை நான் கவனித்து கேட்டதுண்டு. அதைப்போன்று இலங்கை அகதிகளும் அங்கு வசிக்க இயலாமல் திரும்பியவர்கள் என்ற அளவில் செய்தியை அறிந்து கொள்ள முடிந்திருந்தது.

சிங்களர்களின் மிருக குணத்தை பற்றி வளைகுடாவில் பணி செய்து கொண்டிருந்த சமயம் நேரில் அனுபவிக்கும் வாய்ப்பு கிடைத்தது. இலங்கை தமிழர்களால் மட்டுமே சிங்களவர்களை எதிர்கொள்ள முடிந்த சில சம்பவங்களையும் நான் பார்த்ததுண்டு. ஏனெனில் இலங்கையில் சிங்களவர்களுடன் ஒருமித்து வாழ்ந்த காரணத்தால் அவர்களை எப்படி சமாளிப்பது என்பது முன்கூட்டியே இலங்கை தமிழர்கள் அறிந்திருந்தது தான் காரணம் என்பது எனக்கு இப்போதுதான் புரிகிறது. நாங்கள் தமிழகத்திலிருந்து வளைகுடாவிற்கு சென்றவர்கள்தான் என்றாலும் எங்களுக்கு எதிராக பயங்கர சதி திட்டம் உருவாக்கி அதை மிகவும் சரியான நேரத்தில் நம் மீது பிரயோகிப்பதை நாங்கள் கண் கூடாக கண்டு அனுபவித்திருக்கின்றோம். வளைகுடா நாடுகளில் சட்டம் மிகவும் கடுமையானது என்பதால் நாம் மிகவும் கவனத்துடன் வாழ்க்கை நடத்தவேண்டியுள்ளது, அதையே சிங்களவர்கள் தங்களுக்கு சாதகமாக்கி கொள்வதற்கு இடம் கொடுக்காமல் வாழ்க்கையை கத்தி மீது வெறும் காலில் நடப்பதை போன்று நடத்த வேண்டி இருந்த சந்தர்ப்பங்கள் நிறைய உண்டு.

அப்படிப்பட்ட கொடுமைக்காரர்கள் சிங்களவ மிருகங்கள் என்பதை மறுபடியும் நினைவு கூற வைத்தது பாலச்சந்திரன் என்கின்ற சிறுவனின் கொடூர மரண செய்தி. புலிகளின் இயக்கத்தை தடை செய்ததின் காரணமாகவும் தமிழகத்தில் அதிகபட்ச மக்களுக்கு இலங்கைப்போர் சம்பவங்களைப் பற்றிய விவரங்கள் அறியப்படாமல் இருப்பதால் அதை குறித்த தீவிர போராட்டங்களும் எதிர்ப்புகளும் மிகவும் தாமதமாக உள்ளதுடன் சிங்களவர்களுக்கு கொடுக்கப்படவேண்டிய தீர்ப்பு கிடைக்காமல் இந்தியாவிற்கு ராஜபக்சே வருவதற்கு வாய்ப்புகளும் கொடுக்கப்படுகிறது. ராஜீவ் காந்தியின் கொலையை தங்களுக்கு சாதகமாக்கி கொள்ளுகின்ற சிங்கள அரசு அதையே பெரும் சாக்குபோக்காக வைத்து இந்திய அரசுடன் நட்பு பாராட்டுவது போன்ற கண்துடைப்பு செய்து கொண்டிருக்கிறது ஆனால் உலக மனித நேய நீதிக்கு முன்னால் இன்னும் சரியான தீர்ப்பு கொடுக்கப்படாமல் இருப்பதற்கு காரணம் இந்தியாவின் ஒத்துழைப்பு இல்லை என்கின்ற காரணம் மட்டுமே முன் வைக்கப்படுமானால் நீதி என்பதை எப்படி நிறுத்தி வைக்க முடியும் என்பது கேள்வியாக உள்ளது.

இலங்கை தேசம் சிங்களவர்களுக்கு மட்டுமே சொந்தம் என்ற கொள்கையை உடைய சிங்கள அரசு அதன் குடியுரிமை பெற்ற தமிழர்களுக்கு சம உரிமை கொடாமல் சர்வாதிகாரம் செய்து வருவதை உலக நாடுகள் இன்னும் கண்டுகொள்ளாமல் மவுனமாக இருப்பது ஏன். இலங்கையில் போர் நடந்த போதும், நடுநிலை வகிக்கும் அமெரிக்கா அதை பற்றி ஐ நாவில் முன்வைத்து நடவடிக்கை எடுக்க தவறியது ஏன். இன்றுவரை இலங்கை தமிழர்கள் இடம்பெயர்ந்து பலநாடுகளில் தஞ்சம் அடைந்து விட்டதால் சிங்கள வெறியர்களுக்கு சொந்தமாகி கொண்டிருக்கும் இலங்கை பிரச்சினை பதிலில்லாத நிரந்தர கேள்வி மட்டும்தானா.


2/14/2013

அசிங்கம் .....அசிங்கம் !!


இளம் பெண்களைப்பற்றிய தொடர் துயரச் சம்பவங்கள் ஒரு புறம், நீரின்றி காய்ந்து நிற்கும் நெற்பயிர்கள் மற்றொரு புறம், இவைகளுக்கிடையே பல கொலை கொள்ளைகள் தினந்தோறும் சாலை விபத்துக்களில் உயிரிழப்பவர்கள், அத்தியாவசிய பால் மற்றும் பொருள்களின் விலையேற்றம், மின்சாரம் பற்றாக்குறையால் சிறுதொழில் உட்பட தொழில்கள் பாதிப்பு என்று தினமும் வாழ்க்கை துயரமும் வேதனையும் நெஞ்சை வேதனைக்குள்ளாக்கி கொண்டிருக்கும் இச்சமயத்தில் காதல் என்பது கொண்டாடப்பட வேண்டியதா வேண்டாததா என்று பட்டிமன்றம் நடத்தினால் கூட கொண்டாடப்பட வேண்டியது என்றுதான் முடிவுரை வழங்கப்படும். ஏனென்றால் காதல் ஜாதி மத அந்தஸ்த்து பேதங்களை ஒழிக்க வழி வகுக்கும் என்கின்ற நோக்கத்தில். ஆனால் இன்றைய காதல் என்பது சிலருக்கு ஐஸ்க்ரீம் சாப்பிடுவதைப்போல இருக்கிறது, சிலருக்கு அழகு அந்தஸ்த்து அடிப்படையில் தீர்மானிக்கப்படுகிறது, இன்னும் சிலருக்கு சூழ்நிலையால் உண்டாக்கப்படுகிறது. "முதல் காதலா அப்படி என்றால் என்ன" என்று யோசித்துக் கொண்டிருப்பவர்களும் நிறைய பேர் உண்டு. "எதன் அடிப்படையிலும் வருவது காதலில்லை" என்று காதலுக்கு இலக்கணம் கூறும் இலக்கியவாதிகளும் உண்டு. அப்படியானால் 'என்னத்ததான் காதல்ன்னு சொல்லப்போற, புதுசா எதையோ கண்டுபுடிச்ச மாதிரி'ன்னு நீங்கள் முனகுவதும் எனக்கு கேட்கிறது.

காதல் என்கின்ற உணர்வைப்பற்றி பேசுகின்ற சமயத்தில் இன்றைய நடப்பில் இரு இளைஞர்களிடையே ஏற்படுகின்ற காதலைப் பற்றி மட்டுமே குறிப்பிடப்படுகிறது. மேலைநாடுகளில் இன்றைய சூழலில் காதல் என்பது திருமணம் என்கின்ற குடும்ப வாழ்க்கையின் அடிப்படையாக பெரும்பாலும் இருப்பதில்லை, காதலித்து திருமணம் செய்துகொண்டு குழந்தைகளோடு 5 ஆண்டு ஒருமித்து வாழ்ந்தாலே அதிகபட்சமாக கருதப்படுகிறது, அதனிடையே கணவன் மனைவி இருவருக்கும் ஏற்ப்படுகின்ற வெவ்வேறு 'உறவுகளும்' தவிர்க்க இயலாததாக உள்ளது. இன்னும் கொஞ்சம் மேலே சென்று இரண்டு ஆண்களுக்கிடையே காதல் இரண்டு பெண்களுக்கிடையே காதல் என்று காலப்போக்கில் எதேனும் விலங்கு ஒன்றுடன் பெண்ணோ ஆணோ காதலித்து திருமணம் செய்து கொண்டதாக செய்திகள் வந்தாலும் அதை பார்த்து அதிசயிக்க வேண்டியது இருக்காது.

ஆனால் இந்திய நாட்டைப் பொருத்தமட்டில் காதல் என்பது திருமணத்தில் முடியவேண்டும் அதற்க்கு பின்னர் அவ்விருவரும் குழந்தைகளுடன் குடும்பமாக ஒருமித்து வாழ்க்கை நடத்த வேண்டும். திருமணத்திற்கு முன்பு வேறு ஒருவருடன் உறவு இருந்ததாக அறிந்தால் பெண் அல்லது ஆணின் திருமணம் நிறுத்தப்படுகிறது அல்லது அப்படிப்பட்ட பெண்ணையோ ஆணையோ திருமணம் செய்து கொள்வதை தவிர்ப்பது போன்ற முறைகளையே நமது சமூகம் கடைப்பிடித்து வருகிறது. "மானம்" "அவமானம்" என்பதற்கு முக்கியத்துவம் கொடுக்கும் சமூக அமைப்பு. திருமணத்திற்கு அடிப்படையாக ஜாதி மதம் மொழி ஜாதகம் அந்தஸ்த்து என்று வரிசையாக எத்தனையோ தகுதிகளை கொண்டதாக இருக்க வேண்டும் என்று அதிகபட்ச மக்கள் உறுதியுடன் இருக்கின்ற சமுதாயத்தில் காதல் என்பது அங்கீகாரமற்ற 'அசிங்கமான' சொல்லாக இருந்த காலம்மாறி காதலைப்பற்றி பேசுவதும் சில காதல் திருமணங்கள் ஆங்காங்கே நடை பெறுவதை சீர்திருத்தம் என்று சொல்வதா சீரழிவு என்று சொல்லுவதா என்பது தெரியவில்லை. ஏனென்றால் காதலித்த இருவரை கொலை கொள்ளை குற்றவாளிகளை விட மிக மோசமாக தாக்கப்பட்டு கொன்ற, கொல்லுகின்ற பெற்றோர்களை கொண்ட  சமுதாயத்தை உள்ளடக்கிய நாடாக இருக்கின்ற இந்திய 'திரு'நாட்டில் காதலர் தினத்தை கொண்டாட அவசியமில்லைதான். காதலிக்கிறேன் என்று சொல்லிக் கொண்டு ஆணும் பெண்ணும் சுய ஒழுக்கத்தை, கட்டுப்பாடுகளை மீறுகின்ற செயல்களில் ஈடுபடுவதை எப்படி காதலர் தின கொண்டாட்டம் என்று சொல்ல முடியும்.

பெற்றோருக்கும் உறவினர்களுக்கும் நண்பர்களுக்கும் தெரியாமல் ரகசிய சந்திப்பு என்கின்ற பெயரில் பூங்கா, கடற்கரை, தேநீர்விடுதி என்று தனிமையை தேடிச்செல்லும் 'காதலை' கொண்டாடச் சொல்ல முடியுமா. காதல் என்றாலே பிரச்சினை ஏற்படுத்துகின்ற ஒன்றாகிப் போன நமது சமுதாயத்தில் எதற்காக கொண்டாட்டங்கள். இன்றைய சூழலில் ஆண்களும் பெண்களும் இணைந்து பழகும், பேசும் வாய்ப்புகள் அதிகம் காணப்படுவதே இதற்க்கு காரணம் என்றால்  தங்களுக்கு கிடைத்த சுதந்திரத்தை, அங்கீகாரத்தை, முன்னேற்றத்தை காதலுக்காக தவறாக உபயோகிக்க முற்படுவதுதான் 'காதலர் தின' கொண்டாட்டம் என்றால் அதை ஒருபோதும் ஏற்றுகொள்ள இயலாது. காதல் என்பது தனிநபரின் முன்னேற்றத்தை சிதைக்கும் என்றால், பெற்றோருக்கும் பிள்ளைகளுக்கும் இடையூறாக மாற்றுகின்ற ஒன்றாகி அதனால் ஏற்ப்படுகின்ற உயிர் சேதங்கள் நமக்கு சொல்லுகின்ற செய்திகள் என்ன, காதலை ஏற்றுக்கொள்வது  சரியான முடிவா அல்லது அதை எதிர்த்து நின்று போர்க்களம் உருவாக்க முயல்வதா.

காதலில் தொடங்கி திருமணம் குடும்பம் குழந்தைகளோடு பெற்றோர் என்ற வட்டத்தை சிதைக்காமல், இழக்காமல் தொடரும் என்றால் காதலர் தினம் கொண்டாடப்படுவதில் எதிர்ப்பு இருக்காது என்றே நான் கருதுகிறேன். அதை போன்ற காலம் ஒன்று நமது இந்திய தேசத்தை வந்தடையும் என்றால் காதலர்களின் சுதந்திரத்தை யாராலும் தடுக்க முடியாமல் போகலாம். கடற்கரை, பூங்கா, தேநீர் விடுதிகளில் பொதுமக்களின் கவனத்தை ஈர்த்து தங்களை சுற்றி யாருமே இல்லாமல் தாங்கள் இருவர் மட்டுமே இருப்பது போல நினைத்து கொண்டு செயல்படுவதை 'சுதந்திரம்' என்று சொல்லி 'வேண்டுமென்றால் அவர்கள் கண்களை மூடி கொள்ளட்டும் அல்லது எங்களை பார்கின்ற தவறான கண்ணோட்டத்தை தவிர்த்து கொள்ளட்டும்" என்று பொறுப்பற்று பேசும் காதலர்களை நிச்சயம் எதிர்க்க வேண்டும். காதல் என்ற பெயரில் உடல் சுகம் காண்பதும், வாழ்க்கையை பற்றிய பயமின்றி "இலவசத்திலேயே" வாழ்வதை காதல் என்று சொல்லிகொள்பவர்களை நிச்சயம் எதிர்க்கவேண்டும். காதல் செய்கிறேன் என்று சொல்லிக்கொண்டு விருந்துக்கு ஜோடியாக சென்று கும்மாளம் அடிப்பதை எதிர்க்கவேண்டும். இன்னும் எத்தனையோ சொல்ல முடியாத அவலங்களை காதல் என்று சொல்லி கொள்ளும் பேர்வழிகளை ஒழித்து கட்டவேண்டும்.


2/06/2013

மழைக்காக கூட்டு பிரார்த்தனை



முன்மாரி பின்மாரி மழை பொய்த்து விட்டது, நிலத்தில் பயிரிட்ட பயிர்கள் நாசமாகிவிட்டது, வாங்கிய கடனை திருப்பி கொடுக்க இயலாமல் 'இனி உயிர் வாழ்வது எப்படி' என்ற திகைப்பில் சில விவசாயிகள் உயிரை விட நேர்ந்தது, அடுத்து வர போகின்ற கோடைகாலத்தில் குடிநீர் தேவை எப்படி சமாளிக்கப்பட போகிறது, அரிசி விலை அதிகமாகுமா என்பதை குறித்த கேள்வி, மத்திய அரசு குழு பாதிக்கப்பட்ட விவசாய நிலங்களை பார்வையிட்டு சென்றுள்ளது. விவசாயிகளுக்கு நட்ட ஈடு கொடுத்துவிட்டால் அத்துடன் பிரச்சினைகளுக்கு தீர்வு கிடைத்துவிடுமா, குடிநீர் தேவை, மின்சாரத் தேவை எவ்வாறு சமாளிக்கப்போகிறோம் என்பது பெரும் கேள்வியாக உள்ளது.

அறிவியலில் மழை குறைவாக பெய்வதற்கு நிறைய காரணங்கள் கூறப்பட்டாலும், மழையை உண்டாக்குவதற்க்கோ குடிநீரை உண்டாக்கவோ வழிகள் கண்டுபிடிக்கப்பட்டதாக இதுவரையில் தகவல் இல்லை, அரிசி கோதுமை பருப்பு காய்கறி பழங்களை விளைவித்து கொடுப்பதற்கு கூட அறிவியலில் எந்தவித கண்டுபிடிப்பும் இல்லை. நமது முன்னோர்கள் கடை பிடித்த பல வழிமுறைகளை தொடர்ந்து கடைபிடிக்க தவறிவிட்டதன் விளைவு இன்று விவசாயிகள் செய்வதறியாது உயிரை மாய்த்துகொள்ள காரணம் என்று நான் நம்புகிறேன். அது என்ன முன்னோர்களின் வழி: விதைப்புக்கு முன்னர் விளைந்த பின்னர் இறைவனிடம் கள்ளமில்லா நெஞ்சத்தோடு வேண்டுதல் செய்துவிட்டு விவசாயம் செய்தனர். முப்போகம் விளைந்தது.

நேர்மை நாணயம் உபசரிப்பு போன்ற திருவள்ளுவர் கூறும் அத்தனை நன்நெறிகளையும் தங்கள் வாழ்க்கையில் திருக்குறளை படிக்காமலேயே கடைப்பிடித்து வந்தனர், ஆண்களும் பெண்களும் கற்ப்பு தவறாதிருந்தனர், அப்படிபட்ட மக்களுக்கு இயற்க்கை தனது செல்வங்களை வாரி வழங்கி அவர்களை நிறைவுற செய்தது. வீணாக ஒருவனின் உயிரை எடுப்பதற்கு அஞ்சினர், மறுத்தனர் அவ்வாறு செய்தவர் பாவத்தால் அல்லலுறுவர் என்ற பயம் அவர்களை நிறைத்திருந்தது. கள்ளர் இனத்தை சேர்ந்தவர் மட்டுமே திருடி அதை கொண்டு ஜீவனம் செய்தனர், திருடியவற்றைக் கொண்டு கள் குடித்து நடனமாடி தங்களது இன்பத்தை கூட்டமாக ரசித்தனர் என்று வரலாறு கூறுகிறது.

இன்றைய நிலை என்ன? விவசாயிகள் அனைவரும் ஒன்று திரண்டு தங்களுக்கு இழப்பீடு வழங்க கோரிக்கை வைப்பது மின்சாரம் கேட்டு கோரிக்கை வைப்பது போல எல்லோரும் ஒன்று திரண்டு கடவுளிடமும் மழை வேண்டி கோரிக்கை வையுங்கள், அதற்க்கு கூட்டு பிரார்த்தனை என்று சொல்லுகிறார்கள். அவ்வாறு ஒன்று திரளும்போது எப்படி கோரிக்கைகளுக்கு தீர்வு கிடைக்கிறதோ அதுபோல மழை வருவதற்கான வாய்ப்பும் கிடைக்கும். குடிநீருக்காக மழை வேண்டியும் கூட்டு பிரார்த்தனைகள் நடத்துங்கள் நிச்சயம் தீர்வு கிடைக்கும். நம் முன்னோர்களும் இவ்வாறு செய்தனர் இவற்றையெல்லாம் நாம் பின்பற்ற மறந்து விட்டோம் என்பதை சுட்டி காண்பிப்பதே இப்பதிவின் நோக்கம்.

என்னதான் அறிவியல் முன்னேற்றங்கள் வந்தாலும் மழையை உண்டாக்குவதற்க்கோ தானியங்களை உற்பத்தி செய்வதற்கோ அவர்களால் [Scientist] என்றுமே இயலாது என்பது உறுதி. விவசாயம் இல்லாத நாட்டில் அறிவியல் முன்னேற்றம் மட்டும் ஏற்பட்டுவிட முடியுமா. விவசாயிகள் இல்லாத ஊரும் நாடும் அழிந்துபோகும். விவசாயிக்கு மட்டுமல்ல எந்த நாடாக இருந்தாலும் நீர் வசதி இல்லை என்றால் அது பாலைவனமாகத்தான் மாறும். அரபு நாடுகளுக்கு சென்றவர்களுக்கு இதைப்பற்றி நன்கு தெரியும், அவர்களிடம் பூமிக்கு அடியில் நீருக்கு பதிலாக பெட்ரோல் கிடைக்கிறது  அதை ஏனைய நாடுகளுக்கு விற்று அதன் மூலம் கிடைக்கின்ற வருவாயை கொண்டு குடிநீர் உணவு தானியம் என்று எல்லா பொருட்களையும் மற்ற நாடுகளிலிருந்து விலைக்கு வாங்குவதால் அந்நாடுகளில் பொருட்களின் விலை அதிகம். அங்குள்ள சீதோஷ்ண நிலைக்கு குளிர்சாதன பெட்டி  இல்லாமல் வாழவே இயலாது அதனால் மின்சாரம் பொன்னை போன்று விலையேறபெற்ற ஒன்று.

நமது நாட்டில் கிடைக்கும் கனிமங்களும் நமது பூமி விளைவிக்கும் அனைத்தும் நமக்கு கிடைத்த மகா பெரிய பொக்கிஷம். அதை பயன்படுத்த முடியாமல் அல்லது சிலரின் சுயநலத்திற்கு சூரையாடப்படும்போது "கிடைத்ததை சுருட்டிகொள்ளும்" நிலையை புறக்கணித்து நாட்டில் உள்ள வளம் முழுமையாக எல்லோராலும் அனுபவிக்க கூடிய வகையில் நியாயம் நேர்மையுடன் ஒத்துழைக்க வேண்டும். மழைக்காக கூட்டு பிரார்த்தனை செய்வோம் [நேர்மையாக]. வரும் கோடையில் மக்கள் குடிநீருக்காக போராடாமல் சுபீட்சம் பெற மழைக்காக வேண்டுதல் செய்வோம், நாடும் வீடும் வளம் பெற ஒன்று சேர்ந்து முயற்ச்சிப்போம்.


2/04/2013

"பாதுகாப்பு" என்பதன் அவசியம்

சில மாதங்களாக பாதுகாப்பு பற்றிய எனது கருத்தை இங்கே பதிவு செய்யவேண்டும் என்று நினைத்திருந்தேன், பாதுகாப்பு என்பது எங்கே எப்போது யாருக்கு தேவைப்படுகிறது என்ற கேள்வி எழுவது இயல்பு, அடுத்ததாக எந்தவிதமான பாதுகாப்பு கொடுக்கவேண்டும் என்பது பற்றிய கேள்வி, பாதுகாக்கப்பட வேண்டியது எது, யார் என்று வரிசையாக எழும் கேள்விகளுக்கு பதில்கள் மட்டுமின்றி தீர்வு பற்றியும் எனக்குள் தோன்றிய பல கேள்விகளுள் சிலவற்றை மட்டும் இங்கே குறிப்பிட்டு இருக்கிறேன். இன்றைய சூழலில் இந்திய நாட்டிற்கு பகைவரிடமிருந்து பாதுகாக்கப்பட வேண்டிய கட்டாயம் [அவசியமாக] உள்ளது. ஒரு புறம் பாக்கிஸ்தானின் ஊடுருவலிலிருந்து பாதுகாக்கப்பட வேண்டும் மற்றொருபுறம் சீன இந்திய எல்லை பகுதியை பாதுகாக்க வேண்டும், இந்திய தேசத்துடன் நல்லுறவு கொள்வது போன்ற பாவனையில் இலங்கை அரசு பேசினாலும் அதன் போக்கு மிகவும் மோசமானது என்பதற்கு 'எல்லை பாதுகாப்பு' என்ற பெயரில் அப்பாவி மீனவர்களை வாழ விடாமல் அட்டுழியம் நடத்தி வருகின்ற செய்தி தினமும் தொடர்ந்து கொண்டே இருப்பது.

இந்தியநாட்டை சுற்றியுள்ள நாடுகளிடமிருந்து இந்தியாவை பாதுகாப்பது என்பதை பெரும் சவால்களுக்கிடையே சமாளித்து வருகின்ற இந்திய அரசின் நிலைமையை நிச்சயம் கருத்தில் கொள்ளுதல் வேண்டும். பிரதமமந்திரி உள்பட ஏனைய மந்திரிகள் மற்றுமுள்ள உயர்பதவி வகிக்கும் ஒவ்வொருவருக்கும் பாதுகாப்பு அளிக்க வேண்டிய அவசியம் நாளுக்கு நாள் அதிகரித்து வருகின்ற நிலைமை. சுற்றியிருக்கும் நாடுகளிலிருந்து வருகின்ற எதிரிகளின் தாக்குதலில் இருந்து பாதுகாப்பிற்கு முதலிடம் கொடுப்பது என்பது மன்னர் ஆட்சிகாலத்தில் இருந்தே காணப்படும் பாதுகாப்பின் அவசியத்தை போன்றதே என்றாலும் உள்நாட்டில் உள்ள எதிரிகளிடமிருந்தும் நாட்டையும் மக்களையும் பாதுகாக்க வேண்டிய அவசியமும் நாளுக்கு நாள் அதிகரித்து கொண்டே வருகிறது.

தனிநபரின் பாதுகாப்பு பற்றிய அவசியம் நாளுக்கு நாள் அதிகரித்து வருகிறது. மோசடி மன்னர்களின் வித விதமான மோசடி திட்டங்களில் சிக்கிக் கொண்டு தங்களின் வாழ்வாதாரங்களை பரிகொடுத்து தவிப்பவர்களின் பாதுகாப்பு, வீடு புகுந்து கொள்ளை அடித்து செல்லும் கொள்ளையர்களிடமிருந்து பாதுகாப்பு, வீதியில் செல்லும் நபரிடமிருந்து வழிப்பறி நடத்தும் கொள்ளையர்களிடமிருந்து பாதுகாப்பு, வங்கியில் இருந்து பணம் நகை கொள்ளையிடும் கொள்ளையிலிருந்து பாதுகாப்பு, வக்கிரம் மிகுந்த மனிதன் என்ற பெயரில் நடமாடும் மிருகங்களிடமிருந்து பெண்களின் ஒட்டுமொத்த பாதுகாப்பு, குழந்தைகளை திருடிச்செல்லும் கயவர்களிடமிருந்து குழந்தைகளை பாதுகாத்தல், குடிசை வீடுகளை தீயிட்டு கொளுத்தி நாசப்படுத்தும் நயவஞ்சகர்களிடமிருந்து பாதுகாப்பு, என்று பாதுகாப்பு தேவைப்படுபவர்களின் பட்டியல் நீண்டுகொண்டே போகிறது.

நாடு, நாட்டின் முக்கிய நபர்கள், பணம், நகை, நிலம், மீனவர்கள், பெண்கள், குழந்தைகள் என்ற இந்த பட்டியலில் ATM மற்றும் இரண்டு, நான்குசக்கர வாகனங்களும் சேர்ந்து கொண்டுள்ளது. பல இடங்களில் உயர் ரக நாய்கள் கூட பாதுகாக்கப்பட வேண்டியவைகளுள் முக்கிய இடத்தில் இருக்கிறது. இவை அனைத்தையும் பாதுகாக்க வேண்டிய மிகவும் முக்கிய பொறுப்பில் மனிதர்கள் இருப்பது புதிதல்ல, ஆனால் 1.22 பில்லியன் ஜனத்தொகைக்கு போதுமான அளவிற்கு பாதுகாப்பு கொடுப்பதற்கு ஆட்கள் பணியில் அமர்த்தபட்டு உள்ளனரா என்பதும் அவர்களுக்கு  நவீன கருவிகள் கொடுக்கப்பட்டுள்ளதா, நவீன கருவிகளை உபயோகிக்கும் பயிற்சி பெற்றவர்கள் எத்தனைபேர், அவ்வாறு நவீன கருவிகளை யார் மீது எப்போது பயன்படுத்த வேண்டும் என்ற புதிய சட்டம் உள்ளதா. பாதுகாக்கும் படையை சேர்ந்தவர்கள் அவர்கள் எடுத்துக்கொண்ட "உறுதிமொழி"க்கு ஏற்றவாறு தங்களை பாதுகாக்கும் பணியில் முழுமையாக அர்ப்பணித்து கொண்டுள்ளனரா, அவ்வாறு தாங்கள் ஏற்றுகொண்ட பணியில் முழுமையாக அர்ப்பணித்து கொள்ளாமல் எதிரிகளுக்கு உடந்தையாக அல்லது பாதுகாப்பு சட்டத்திற்கு விரோதமான செயல்களில் ஈடுபடுபவர்களுக்கு சட்டத்தில் தண்டனை அதற்க்கு ஏற்றதாக உள்ளதா,

இது போன்ற கேள்விகளுக்கு நமது நாட்டில் இன்றுவரையில் சரியான பதில் இல்லை, அவ்வாறு பதில் இல்லாமல் இருக்கின்ற பட்சத்தில் பாதுகாப்பு என்பதும் கேள்விகுரியானதுதான். பாதுகாப்பு என்று சொல்லுகின்ற சமயத்தில் வீதியில் குடித்துவிட்டு ஒரு பெண்ணை கேலி செய்தால் அவர் குடித்ததினால் சுயநினைவில்லாமல் அவ்வாறு செய்கிறார் என்று கூறி விட்டுவிடுவதும் குடித்துவிட்டு மனைவி குழந்தைகளை துன்புறுத்துவதும் தினம்தோறும் பல வீடுகளில் வேதனையை தரும் நிகழ்வாகிவிட்டது, குடித்துவிட்டு பெண்ணை பாலியல் வன்கொடுமைக்கு ஆளாக்கும் சம்பவங்கள் பெருகி விட்டது. குடித்து அதனால் உடல்நிலை மோசமாகி இறந்து போகிறவர்கள் எண்ணிக்கை நாளுக்குநாள் அதிகரித்து வருகிறது. குடியிலிருந்து இவர்களை பாதுகாக்கப் போகிறவர்கள் யார்.

"பாதுகாப்பு" என்பது ஏழை முதல் பணக்காரன் வரை அதிகரித்து வரும் தேவைகளில் மிகவும் முக்கியமான ஒன்று. அதற்க்கான புதிய திட்டங்களோ சட்டங்களோ இதுவரையில் இல்லை, குறைந்தபட்ச  பாதுகாப்பு என்பது கூட கேள்விக்குறியாக உள்ளது. அதனால் அவரவர் பாதுகாப்பிற்கு அவரவர் முழு பொறுப்பு ஏற்றுகொள்வது கட்டாயம். தினச்செய்திகளை கட்டாயம் பார்ப்பது அவசியம், பல வீடுகளில் தொலைக்காட்சி பெட்டி இருந்தாலும் அதை பொழுபோக்கிற்கு மட்டுமே உபயோகிப்பதை வழக்கமாக கொண்டுள்ளனர், தினம் காண்பிக்கப்படுகின்ற தொடர்கதைகளையே பொதுவாக விரும்பி பார்கின்றனர், மனிதர்களுக்கு பொழுதுபோக்கு தேவை என்றாலும், மிகவும் அவசியமானது என்று கூற இயலாது. தொலைகாட்சியை ஒருநாள் முழுவதும் பொழுதுபோக்கிற்கு மட்டுமே பயன்படுத்துவதால் நாட்டில் அன்றாடம்  நடக்கும் உண்மை சம்பவங்களை அறிந்து கொள்ள இயலாமல் போகிறது.

தொலைகாட்சியில் தினமும் கொள்ளை கொலை போன்றவற்றை செய்திகளில் பார்க்க முடிகிறது, செய்திகளை தினமும் தவறாமல் பார்ப்பதால் எத்தகைய சூழலில் அந்த கொள்ளை கொலை சம்பவங்கள் நடந்திருக்கின்றது என்பதை நம்மால் ஓரளவு தெரிந்து கொள்ள முடிகிறது, அதை போன்ற சந்தர்ப்பங்களை நாம் தவிர்த்து கொள்வதாலும் அல்லது அதை நமக்கு தெரிந்தவர்களிடம் எடுத்து சொல்வதாலும் இத்தகைய அசம்பாவிதங்களை ஓரளவிற்கு நாம் தவிர்க்க முடியும், அதே போல பலவித பண மோசடிகளை பற்றி செய்திகளை பார்க்கும் நமக்கு யாரையெல்லாம் நம்பி பணம் கொடுக்க கூடாது என்பதை அறிந்து செயல்பட முடியும். டெல்லியில் நடந்த இளம் பெண் கொலை சம்பவத்தின் செய்தியை பார்க்கும்போது எப்படிப்பட்ட அசந்தர்ப்பங்களை நம்மால் தவிர்க்க முடியும் என்று நாம் தெரிந்துகொள்ள முடிந்தது.

முற்றிலும் தெரியாத நபர்களிடம் பேசுவது பழகுவது என்பதை முற்றிலும் தவிர்ப்பது நல்லது என்பதை கூட செய்திகளில் வருகின்ற பல சம்பவங்கள் நமக்கு எடுத்து காட்டுகிறது. விபத்து ஆபத்து இரண்டையுமே தவிர்க்க நாமே எல்லா சந்தர்ப்பங்களிலும் தயாராக இருப்பதற்கு தவறாமல் செய்திகள் பார்ப்பதை பழக்கப்படுத்தி கொள்வது மிகவும் அவசியம். தெரியாத நபர்களிடம் இருந்து மட்டுமே எப்போதும் ஆபத்து வருவது இல்லை நமக்கு மிகவும் பழக்கப்பட்ட நபர்கள் வழியாக கூட ஆபத்து நமக்கு உண்டு என்பதை பல செய்திகளின் மூலம் நம்மால் அறிந்து கொள்ள முடியும். தொலைகாட்சிபெட்டி இல்லாத வீடே இல்லை என்று சொல்லும் அளவிற்கு இன்றைய சூழல் இருந்தும், வீட்டிற்குள்ளேயே அதற்கான தீர்வுகளை வைத்து கொண்டு அதை அலட்சியப்படுத்தும் நபர்களை தேடித்தான் இத்தகைய ஆபத்துக்களும் விபத்துக்களும் விரைந்து செல்கிறதோ என்று எண்ண  வைக்கிறது.

நம்மை நாமே பாதுகாத்து கொள்வது இன்றைய கட்டாயம், வேறு ஒருவரின் உதவியால் மட்டுமே நமக்கு பாதுகாப்பு கிடைத்துவிடும் என்று நம்பியிருப்பது நமக்கு நாமே வைத்துகொள்ளும் "ஆப்பு" என்பதை ஒவ்வொருவரும் கவனத்தில் கொள்வது இன்றைய அவசியம்.