Translate

11/22/2010

வருமுன் காப்போம்

உணவு என்பது மனிதனின் முக்கிய தேவை. உணவு உண்பதால் நாம் ஆரோக்கியத்துடன் உயிர் வாழ்கின்றோம், உணவை விரும்பி உண்பதற்காக, சுவையாக சமைக்க, பலவிதங்களில் உணவில் சுவையை உண்டாக்குவதற்க்கென பல பொருட்களின் துணையுடன் உணவை தயாரித்து உண்கின்றோம். ஆனால் அப்படி உணவின் சுவையை அதிகரிப்பதற்காக நாம் கண்டுபிடித்த பல பொருட்களினால் உடலுக்கு ஏதேனும் நன்மைகள் உண்டா என்பதை நாம் சிந்தித்தோமா. காரம் புளிப்பு உப்பு கரம்மசாலா எண்ணெய் என இவற்றின் எண்ணிக்கை அதிகரிப்பதால் நமது உடலுக்கு நன்மை என்ன தீமை என்ன என்பதை நாம் எப்போதாவது சிந்தித்து அதன்படி சமைப்பதற்கு முயலுவதுண்டா.

மனைவியோ அல்லது வீட்டில் வேறு யாரோ சமைக்கும் உணவு சுவையாக இல்லாவிட்டால் அவர்களை திட்டுவதும் உணவகத்திற்குச் சென்று நாவின் சுவைகேர்ப்ப உண்பதும் நமது வழக்கம். நாவின் சுவைக்காக உணவை பக்குவப்படுத்தி சமைத்து உண்ணுகின்ற அதே சமயத்தில் சுவைக்காக சேர்க்கப்படும் பொருட்கள் உடலுக்கு எந்த விதத்தில் தீமை செய்கிறது என்பதைப்பற்றி நாம் அறிய முயன்றிருக்கின்றோமா. சுவைக்காக அதிகப்படியான உணவை உண்பதால் உடலுக்கு ஏற்ப்படும் தீமைகளைப் பற்றி நாம் அறிந்திருக்கின்றோமா. உடலுக்கும் பசிக்கும் உணவு முக்கியம் என்பதைத்தவிர அதை எவ்வாறு உண்ணவேண்டும் என்பதை நாம் சிந்தித்து செயல்படுவது உண்டா.

உடலுக்கு ஏதேனும் நோய்கள் உண்டான பின்பு மருத்துவர் குறிப்பிட்ட உணவு வகைகளை சாப்பிடக்கூடாது என அறிவுறுத்தினாலும் பலரால் பலவகையான ருசிகளை சாப்பிடாமல் இருப்பதற்கு முடிவதில்லை. இதற்க்கு காரணம் பழக்கம், பழக்கம் என்பது மனிதன் தனது சிறுவயது முதலே கைப்பற்றி வருவது. அவ்வாறு சாப்பிட்டு பழகியதால் அவ்வித சுவைகளை நாக்கு பழகி விடுகிறது. பின்னர் அத்தகைய சுவைகளுடன் கூடிய உணவைத் தவிர வேறு வகையான சுவை குறைவான உணவை ஏற்க்க மறுக்கிறது. உடல் நோய்வாய்பட்டு படுக்கையில் அல்லது மருத்துவரின் ஆலோசனையின்படி உணவை உண்ணும் கட்டாயம் ஏற்படுகின்ற வரையில் அத்தகைய உணவுகளை உண்பதையே தங்களுக்கு திருப்தியளிப்பதாக கருதுகின்றனர்.

வாய்க்கு ருசியாக சமைத்து உண்போம் பிறகு நோய்வாய்பட்டு கிடக்கின்ற போது மருத்துவர் கூறும் உணவுகளை சாப்பிட்டுக்கொள்ளலாம் என்று சிலர் கூறுவதும் உண்டு. ஆனால் பலரது உடல்நிலை தங்கள் சாப்பிட்ட ருசியான உணவு வகைகளால் முற்றிலுமாக பாதிப்பிற்கு உள்ளான பின்பு மருத்துவர் கூறும் உணவு முறைகளை கைபற்றுவதினால் காலம் கடந்தநிலையால் உடல்நிலையில் ஏற்படுகின்ற பாதிப்புகளிலிருந்து குணமாக இயலாமலே போவதை காண முடிகிறது. அதிக காரம், உப்பு, சர்க்கரை, புளி, கரம் மசாலா போன்ற பலவகையான பொருட்களால் உடலுக்கு எவ்வித நன்மைகளும் ஏற்படுவதில்லை மாறாக தீமைகளே அதிகம் உண்டாகும், சிலர் இவற்றை அறிந்தும் சிலர் அறியாமலும் அதிகப்படியாக உட்கொண்டு தங்களது நாவை பழக்கப்படுத்திகொண்டு பின்னர் அவதியுறும் நிலைக்கு தள்ளப்படுவதை காண முடிகிறது.

உணவை அதிக சுவையுடன் சமைப்பதால் அதிகம் உண்பதற்கு ஆவலைத் தூண்டுவதனால் அதிகம் உண்பதால் ஏற்படுகின்ற உபாதைகளும் உடலில் ஏற்படுவதை நம்மால் தவிர்க்க இயலாமல் போகிறது. பசிக்கு உணவா ருசிக்கு உணவா என்பதையும் உணவே மருந்து மருந்தே உணவு என்பதையும் கைகொள்ள பழகுவதே வருமுன் நம் உடலை காக்கும் சிறந்த வழிகளாகும்.



&&&&&&&&&&&

11/17/2010

செய்திகள்

முதன்மை செய்திகளில் சில பரபரப்பான தகவல்கள் கடந்த சில நாட்களாக எல்லோரையும் கவர்ந்திருக்கிறது. பொது மக்கள் எப்போதிலிருந்து ஒற்றுமையாக மாறிப்போனார்கள், நல்ல விஷயம்தான், இதே ஒற்றுமை எல்லாவிதங்களிலும் இருந்து விட்டால் இந்திய தேசம் நிச்சயம் சிறப்பான எதிர்காலத்தை கொண்டுள்ளது என்றே சொல்லலாம். என்ன எடுத்த எடுப்பிலேயே தலையும் வாலும் இல்லாமல் எதையோ குறிப்பிடுகிறேன் என்று முனகுவது புரிகிறது, கோவையில் கடத்தி கொலை செய்யப்பட்ட இரு குழந்தைகளுக்காக மக்கள் கொதித்து எழுந்ததும், காவல்துறையின் அபாரமான என்கவுன்டரும் SIMPLY SUPERB !! அட்ரா சக்கை என்று சொல்ல வைத்தது. போலீஸ் இலாகாவின் மீது மக்களுக்கு நிச்சயம் மதிப்பு கூடும் என்பதில் ஐயமில்லை.

சென்னையில் கடத்தப்பட்ட மாணவனை மீட்டு கடத்திய பொறியாளர் இருவரை கைது செய்ததும் 'இதுதாண்ட போலீஸ்' என்று உவகை கொள்ளச்செய்தது. காவல்துறைக்கு நிறைய புதியவர்களை சேர்ப்பதற்கும் புதிய திறமைகளை வெளிக்கொணரவும் புதியவர்களுக்கு வாய்ப்பளிப்பதன் மூலம் வேலைவாய்புகள் பெருகவும் காவல்துறையில் இருக்கும் பற்றாக்குறையை ஓரளவாவது நிவிர்த்தி செய்யவும் தமிழக முதலமைச்சர் அறிவிப்பும் செயல்பாடுகளும் நிச்சயம் உதவும் என்பதில் சந்தேகமில்லை.

அடுத்து என் கவனத்தை ஈர்த்த செய்தி ஜெயலலிதா அவர்கள் சோனியா காந்தியுடன் அதாவது காங்கிரசுடன் தங்களது கட்சியை இணைக்க வலிய சென்று கேட்டதாகவும் அதற்க்கு காங்கிரஸ் கட்சி ஒத்துக்கொள்ளவில்லை என்பது. திடீரென ஜெயலலிதா எதற்காக காங்கிரசுடன் கூட்டணி சேர எண்ணினார் என்பதும், அதுவும் மத்தியில் உள்ள காங்கிரசுடன் ஏற்கனவே தி. மு. க. கூட்டணியில் இருப்பதை அறிந்திருந்தும் எதற்காக இந்த திடீர் முடிவு என்பது எனக்கு ஆச்சரியத்தை ஏற்படுத்திய செய்திகளில் மிகவும் முக்கியமானது.

அடுத்து என் கவனத்தை ஈர்த்த செய்தி மத்திய அமைச்சர் திரு ராசாவின் மீது ஏற்கனவே சொல்லபட்டிருந்த ஸ்பெக்ட்ரம் ஊழல் என்பதைப் பற்றியது, இந்த ஊழலை முன் வைத்து தி. மு.காவை காங்ரசுடனிருந்து பிரிக்க ஆலோசனையில் துரிதமாக செயல்பட்டு வருகின்ற எதிர்கட்சிகளின் நடவடிக்கை, நாடாளுமன்ற அவைகளை நடத்த விடாமல் புறக்கணித்த செய்தி. அமைச்சரது ராஜினமாவிற்கு பின்னரும் தொடருகின்ற எதிர்கட்சிகளின் புறக்கணிப்பு என்பது ஊழலற்ற ஒழுக்கம் நாட்டில் நிலவ வேண்டும் என்கின்ற நல்ல எண்ணத்துடன் செயல்படுவதாக மக்கள் நினைக்க வேண்டுமா அல்லது கூட்டணியை சிதைக்க கையில் கிடைத்த நல்ல சந்தர்ப்பத்தை பயன்படுத்திக் கொள்ளும் திட்டமா என்பது விளங்கவில்லை.

அடுத்த செய்தி கொஞ்சம் பழைய செய்தியாக இருந்தாலும் என் நினைவில் இன்னும் இருந்து கொண்டு இருக்கின்ற செய்தி, அமெரிக்க அதிபர் ஒபாமாவைப்பற்றியது. ஒபாமாவிற்கும் ஒசாமாவிற்க்கும் என்ன வித்தியாசங்கள் என்று என்னிடம் கேட்டால் ஒசாமா மலை காடு என்று ஒளிந்து கொண்டு தங்கள் மதத்திற்கு ஏதோ பெரிய நல்ல காரியம் செய்வதாக நினைத்துக் கொண்டு தீவிரவாதியாக வாழ்கிறான்(?), ஒசாமா தனது பேச்சின் மூலம் அமெரிக்கர்களை மயக்கிவிட்டு பெருவாரியான ஓட்டுக்களை பெற்று அமெரிக்காவின் ஜனாதிபதி பதவியை ஏற்று வாழ்கிறார் (இவரது பதவிகாலம் முடிவடைவதற்கு முன்பே அமெரிக்க மக்களின் புத்திசாலித்தனம் ஒபாமாவின் புத்திசாலிதனத்தை என்னவென்பதை அறிந்துகொண்டுவிட்டது), மதவாதியான ஒசாமா தீவிரவாதி என்றால், மத கருத்துக்களின் தீவிரத்தை தன் மனதினுள் மறைத்திருக்கும் ஒசாமா அமெரிக்காவின் தற்போதைய ஜனாதிபதி.

ஒசாமா ஆயுதங்களை நம்பி காடு மலைகளில் கஷ்டப்படுபவர், ஒபாமா தனது பேச்சுத் திறமையால் வெள்ளைமாளிகையில் சுகவாசத்தை அனுபவிக்கிறார். இருவரில் யார் புத்திசாலி என்பது நான் சொல்லாமலேயே தெரிந்திருக்கும். ஒபாமா பிழைக்கத்தெரிந்தவர், ஒசாமா மதத்தின் பெயரால் தன்னை கடினமான வாழ்க்கைக்கு புகுத்திக்கொண்டவர். ஒபாமாவிற்கு அமெரிக்கா டாலர்களை சம்பளமாக அள்ளிக் கொடுக்கிறது, ஒசாமாவை பிடிக்கவும் அழிக்கவும் அமெரிக்கா டாலர்களை அள்ளிக்கொடுக்கிறது. ஒசாமாவில் 'சா'வும் ஒபாமாவில் 'பா'வும் ஒளிந்துகொண்டுள்ளது.


அடுத்த செய்தி தமிழகத்தின் பள்ளிக்கூடங்களுக்கு என்னதான் ஏற்பட்டதோ தெரியவில்லை, அடிக்கடி செய்திகளில் பள்ளிகூடங்கள் பலவித செய்திகளை கொடுத்து வருகிறது. பள்ளிக்கூடத்தில் ஆசிரியரைப்போல வந்து மாணவிகளின் நகைகளை கொள்ளையடித்துச் சென்ற ஆசிரியர் வேடத்தில் திருடன். பள்ளி மாணவர்களை ஏற்றிக்கொண்டு சென்ற வண்டி கவிழ்ந்து குழந்தைகள் பலி. அதிக கட்டணம் வசூலிப்பதாக கூறி பெற்றோர்கள் முற்றுகைப் போராட்டம். கோவிந்தராஜன் கமிட்டியின் தலைவர் மாற்றம், பள்ளி மாணவிகளை பாலியல் தொல்லை கொடுத்ததாக ஆசிரியர் கைது. இன்னும் விதவிதமான செய்திகள் தினம் தொகுப்பில் இடம்பெற தவறுவதில்லை.

இதற்கிடையே நெய்வேலியில் வேலை நிறுத்தம் முதல் நாள் இரண்டாம்நாள் மூன்றாம்நாள் என தொடரும் போராட்டத்தினால் மின்சார உற்பத்தி பாதிப்பு. லாரி உரிமையாளர்கள் வேலை நிறுத்தம், லாரி ஓட்டுனர் வேலை நிறுத்தம், இதனால் பல கோடி பெறுமான பொருட்கள் தேக்கம், பல கோடி நஷ்டம். ஜல் புயலினால் தமிழகம் முழுவதும் பலத்தமழை, மழை தொடரும் என வானிலை அறிவிப்பு. சென்னையில் சாலைகளில் மழைநீர் தேங்கியதால் போக்குவரத்து பெரும் பாதிப்பிர்க்குள்ளானது. தென் மாநிலங்களில் பலத்தமழை, பயிர்கள் அழுகும் நிலை, வீடுகளில் மழை நீர் புகுந்தது, சுவர்கள் இடிந்து விழுந்ததில் ஒருவர் பலி.




@@@@@@@@@

11/10/2010

அடடா இது என்ன விந்தை .....!!

விவாதம் என்பது மனிதனுள் தினம் நடக்கும் போராட்டங்கள், அவற்றில் எது எதை மேற்கொள்ளுகிறது என்பதில் முடிவு கிடைக்கிறது அதன்படி செயல்படுகிறோம். மனமும் அறிவும் அதிகமாக மனிதனுக்குள் போராட்டம் செய்பவை என்பதை பலரும் அறிவர், ஆனால் நம் இதயமும் - மூளையும், நரம்புகளும் - மூளையும், எலும்புகளுடன் சதையும், ரத்த நாளங்களுடன் ரத்தமும், ரத்தத்தில் உள்ள வெள்ளை மற்றும் சிகப்பணுக்களும், உணவுடன் குடல்களும், உணவின்றி தவிக்கும்போது என்சைமுடன் குடல்களும் குடலினுள் உள்ள சிறு உறிஞ்சிகளும் என்று ஒவ்வொன்றும் ஒவ்வொரு விதத்தில் தினம் தினம் நிமிடம்தோறும் போராடி வெற்றிக் கொள்கின்றன.

இவற்றில் ஏதேனும் ஒன்று வலுவிழந்து அதன் போராட்டம் குறையும் போது நோய்வாய்படுவதுடன், வலுவிழந்து செயலிழந்தும் விடுகின்றது. தூக்கம் சமயத்திற்கு வராமல் கண்களும் அதன் சம்பந்தப்பட்ட உறுப்புகளும் நாளடைவில் அதன் செயலில் குறைபட்டு அதனால் நோய்கள் அந்த உறுப்புகளுக்கு ஏற்படுகிறது, தினம் தினம் டென்ஷன் எனப்படும் வேலைப்பழு குடும்பத்தில் அல்லது மற்ற பிரச்சினைகளால் ஏற்படுகின்ற அழுத்தம் ரத்த அழுத்தத்தை அதிகரித்து இதயத்தின் செயல்பாட்டில் மிகவும் தீவிரமான குறைகளை ஏற்ப்படுத்தி செயலிழக்கச் செய்வதை நாம் அறிவோம், இதையே ரத்தக்கொதிப்பு மற்றும் சர்க்கரை நோய்க்கு அடிப்படை காரணம் என்று மருத்துவம் கூறுகிறது. மனிதன் பிறந்தது முதல் அவனது உறுப்புகள் செயல்பட துவங்கிய காலம் முதல் ஒவ்வொரு உறுப்பும் ஒவ்வொரு தேவைக்காக போராடத்தான் வேண்டியுள்ளது.

இதில் சிறுவர் பெரியவர் என்ற பாகுபாடுகள் இல்லையென்றாலும் சில பிரச்சினைகள் குழந்தைப்பருவத்திலேயே உடலில் தோன்றிவிடுவதும் மிகவும் வருத்தமான விளைவே. இத்தகைய குறைகள் பிறக்கும் குழந்தைகளுக்கு ஏற்படாமல் தடுக்கவே குழந்தை கர்பத்தில் இருக்கின்ற ஒவ்வொரு மாதமும் மருத்துவரிடம் சென்று தாயின் உடல் பரிசோதனைக்கு உட்படுத்தப்படுகிறது. இந்த காலத்து இளம் பெண்கள் இவ்வித பொறுப்புகளை ஏற்க்க விருப்பமில்லாமல் திருமணம் செய்து கொள்வதை தவிர்த்து திருமண பந்தத்திற்குள் நுழைவதற்கு தயக்கம் காட்டுவதால், வேறு பிரச்சினைகளை தானே தேடிக்கொள்ளுகின்றனர்.

ஒரு பெண் பூப்பெய்திய பின்னர் அவளது உடல் குழந்தையை உற்பத்தி செய்வதற்கு தயாராக்கப்படுகிறது, ஒரு குழந்தையாவது குறிப்பிட்ட காலத்திற்குள் பெற்றுக்கொள்ளாமல் உடலை பேணி காக்கும் பெண்டிருக்கு மார்பக புற்று நோய், கர்பபை புற்று நோய், போன்ற நோய்கள் உருவாக காரணமாகிறது என்று மருத்துவ செய்திகள் தெரிவிக்கின்றது. ஆணிற்கு இதை போன்ற பிரச்சினைகள் ஏற்படுவது கிடையாது ஏனென்றால் குறிப்பிட்ட பருவம் வந்த பின்னர் உடலில் உண்டாக்கப்படும் விந்துக்கள் தானாகவே குறிப்பிட்ட காலத்திற்குள் வெளியேற்றிவிடுகின்ற உடலமைப்பை ஆடவர்க்கு இயற்க்கை வரபிரசாதமாக வழங்கியுள்ளதே இதற்க்கு காரணம் என்கிறது மருத்துவம். பெண்கள் குறிப்பிட்ட வயதில் திருமணம் செய்யாமல் இருப்பதால் மனநிலை பாதிப்புகள் ஏற்ப்படும் வாய்புகள் உண்டென்கிறது மருத்துவம்.

போராட்டம் என்பது எல்லா உறுப்புகளிலும் ஏற்பட்டாலும் அடிக்கடி நம்மை குழப்பி நமக்கு அதன் ஆதிக்கத்தை வெளிகாட்டுவது மூளையும் அதன் நரம்புகளும்தான். இங்கிருந்தே மனம் என்கின்ற பேரரசன் தனது செங்கோலை நீட்டி தனது ஆட்சியை நிலைநாட்டுகிறான். இதனால் பிரச்சினை மற்ற உறுப்புகளுக்கு ஏற்படுவதை விட, மனிதனின் சமூகத்தோற்றத்தை வெளிப்படையாக காட்டவும் முடிகிறது. தனக்குத்தானே எதிரியாக இருக்கின்ற இரு வேறு நிலைகள் மனித உடலில் மனமும் சிந்தனைகளும் அதன் தொடர்ச்சியான செய்கைகளும். மனம் ஒன்றும் அறிவு ஒன்றும் சொல்லுவது பின்னர் வேறு செயல்களை செய்வதும் இவற்றின் காரணமே. இந்த இரு உறுப்புகள் மனித உடலில் பெரும் போராட்டத்தை நடத்தி வருவது மிகவும் வியப்பான ஒன்று. "நான்" என்கின்ற ஒற்றை வார்த்தைக்கு இரு வேறு பிரதிபலிப்புகளை உள்ளடக்கியது இந்த [மூளையும்] மனமும் செயல்களும், இது இயற்கையின் அபூர்வ அமைப்பென்றே சொல்லலாம். தோற்ற அமைப்பிற்கும் அல்லது உருவத்திற்கும் செய்கைக்கும் எதிர் மாறான காரியங்களை நம்முடலில் நடத்துவதும் இவைதான். என்ன விந்தை.



++++++++++++++++

11/02/2010

தீபாவளி நல் வாழத்துகள்


தீப ஒளித்திருநாள் தீபாவளி நெருங்கி விட்டது, அசுரனை கொன்ற கதையை மறந்து தீபங்களை ஏற்றி வைத்து புத்தாடை அணிந்து இனிப்புகள் சாப்பிட்டு, ஒருவருக்கொருவர் பரிமாறிக்கொண்டு, உறவினர் வீடுகளுக்கு திரைப்படங்களுக்கு, கடற்கரைக்கு என எல்லா இடங்களுக்கும் குடும்பத்தினருடன் சென்று வயிறார ருசியாக உண்டு பட்டாசுகள் வெடித்து கொண்டாடப்படும் தீபாவளிக்கு, ஜாதி மதங்கள் அவசியமில்லை. கையில் பணமும் அதை செலவாக்கும் வழிகளும் மட்டுமே தெரிந்திருந்தால் போதும். அசுரனை கொன்ற தினம் தீபாவளி என்றால் அதில் உடன்பாடு இல்லாதவர்களும் உண்டு, ஆனால் குடும்பத்துடன் கொண்டாடுகின்ற ஒளித்திருநாள் என்ற பெயரில் பட்டாசுகளை வெடிக்கும் சந்தர்ப்பத்தில் பங்குகொள்வதற்கு ஜாதிகளோ மதங்களோ அவசியமற்றதாகிவிடுகிறது.

இவ்வருடம் சிவகாசியில் நிறைய பட்டாசு தயாரிக்கின்ற இடங்கள் எரிந்து சாம்பலான காரணமோ என்னவோ தெரியவில்லை, ஊரே ஊரடங்கு தீபாவளியாக அங்கொன்றும் இங்கொன்றுமாக டமால் டமால் என்று திடீர் அதிர்வுகளை ஏற்படுத்துகின்ற பட்டாசு வெடிகளின் சத்தம் கேட்கவில்லை. சமூக விரோதிகளின் அத்து மீறல்களும் குழந்தை தொழிலார்களை பட்டாசு தயாரிப்பில் ஈடுபடுத்தி அதிக லாபம் சம்பாதித்துவந்த, பதிவு செய்யப்படாத பட்டாசு தயாரிக்கும் நிறுவனங்கள் காணாம் போனதாலும், இவ்வருடம் எங்கே பார்த்தாலும் கேட்கின்ற வெடி சத்தம் கேட்கவில்லை. உழைத்து சம்பாதிக்கின்ற காசை நல்ல முறையில் உபயோகித்து சந்தோசம் காண்பதே சிறந்த வழி, அதை விடுத்து நொடியில் வெளிச்சத்தையும் சப்தத்தையும் எழுப்பி விட்டு விட்டு உடனே அடங்கி போகின்ற விலை உயர்ந்த பட்டாசுகளை வாங்கி காசை கரியாக்குவது குறைந்தால் எத்தனையோ வீடுகளில் குழந்தை தொழிளாலர்கள் விடுதலை பெற்று படிக்க அல்லது வேறு தொழில் கற்பதற்கு செல்ல நேரும்.

தீபாவளி என்றாலே வெடியும் இனிப்பும்தான் முக்கியம் என்று சிலர் கூறுவார், நான் வசித்த பகுதியில் தீபாவளியன்று விடியற்காலை சரியாக மூன்று மணி முதல் ஊரே ஒரே நேரத்தில் நான்கு மணி வரையில் இடைவிடாது பட்டாசு கொளுத்தி வெடிப்பார்கள், அப்போது கேட்கின்ற அந்த சப்தம் மிகவும் வித்தியாசமானது. இந்த வருடம் தலை தீபாவளி கொண்டாடுகின்ற பலரும் மிகவும் உற்சாகமாக தீபாவளியை எதிர்நோக்கி உள்ளனர். எல்லோருக்கும் எனது இனிய தீபாவளி நல் வாழ்த்துகள்.



VVVVVVVVVV

10/30/2010

விஜய் டி.வி நீயா நானாவில் நானும் ......

எத்தனை நாட்களுக்குத்தான் தொலைக்காட்சிகளில் ஒளிபரப்பப்படும் கவியரங்கங்களையும் பட்டிமன்றங்களையும் நீயா நானாவையும், கருத்து யுத்தத்தையும் பார்த்து மட்டுமே ரசித்துக்கொண்டிருப்பது நாமும் கலந்து கொண்டால் என்ன என்று திடீர் எண்ணம் மனதில் எழுந்தது, அதன் விளைவு நீயா நானாவிற்கு கருத்துக்களை தெரிவிக்க சென்று வந்த அனுபவம் ஏற்பட்டது, அங்கே என்ன தான் பேசுகிறார்கள் என்பதைவிட எப்படி ஒரு நிகழ்ச்சியை உருவாக்குகிறார்கள் என்று அறிந்துகொள்ளும் ஆவலுடனேயே சென்றேன், அன்றைக்கு பார்த்து பிரசாத் ஸ்டுடியோவில் நீயா நானா நிகழ்ச்சிகள் மட்டும் காலை ஒன்பதுமணி முதலே பதிவு செய்யப்பட்டதாக தெரிய வந்தது, சாதாரணமாக என் பிள்ளைகள் எப்போதும் வெளியூர்களில் இருப்பவர்கள் அன்றைக்கு பார்த்து விடுமுறையில் என்னுடனிருக்க 'நானும் வருகிறேன் என்று என்னுடன் ஒன்று ஒட்டிக்கொண்டது' ஆசைதானே, வந்துவிட்டு போகட்டும் வேறு ஒரு சந்தர்ப்பம் இதற்கென்று கிடைக்கவா போகிறது என்று எண்ணி உடன் அழைத்துச் சென்றேன்.

பார்ப்பதற்கு திரைப்பட நடிகையைப்போல இருந்த என் மகளை அங்கிருந்தவர்கள் உற்று பார்க்கத்தவறவில்லை, அதை பார்த்த என் மகளும் என் கணவரும் சற்றே ஆச்சர்யம் அடைந்தனர், எனக்கு கொடுக்கப்பட்ட தலைப்பு 'ஆண்களுடன் பெண்கள் நண்பர்களாக பழகுவதை எதிர்ப்பவரா அல்லது ஆதரிப்பவரா' என்பது, நான் இந்த விஷயத்தில் மிகவும் தாராளம் என்றும் கூறிவிட இயலாது, கருமி என்றும் சொல்லிவிட முடியாது. நான் [டீன் ஏஜில்] பதின்ம வயதில் இருந்த காலத்தில் என் தகப்பனார் எனக்கு அப்பகுதில் புதிதாய் குடி வந்திருந்த ஒரு பையனை அறிமுகப்படுத்தி இரவில் மிகவும் நேரம் சென்றபின்னர் முடியும் வகுப்புகளில் இருந்து வீட்டிற்கு திரும்புகின்ற போது உடன் படித்த பையனுடன் சேர்ந்து வர அனுமதி கொடுத்து அறிமுகமும் செய்து வைத்தார்.

என் பெற்றோர் நான் என் வயதொத்த பையன்களிடம் பேசினாலோ பழகினாலோ தவறு என்று கட்டுபாடுகள் விதித்தது கிடையாது, ஆனால் அதற்கென்று என் வீட்டின் அருகிலிருந்த எல்லா பையன்களிடமும் நான் பழகியதும் கிடையாது. படித்து முடித்த பின்னரும் அந்த பையன் எங்கள் வீட்டிற்கு வந்து உட்கார்ந்து மணி கணக்கில் அரட்டை அடிப்பதும் வழக்கமாகியது, அந்த பையனின் அப்பாவும் என் அப்பாவின் நண்பர், ஆனால் அந்த பையன் என் வீட்டில் வந்து உட்கார்ந்து பேசிக்கொண்டிருப்பது அவர்கள் வீட்டிற்கு சில மாதங்களுக்குப் பின்னர் தான் தெரிய வந்தது, அப்போது அந்த பையன் வேலைக்காக விண்ணப்பித்து மும்முறமாக வேலை தேடிக்கொண்டிருந்த சமயம், அவனது அம்மாவிற்கு அவன் எங்கள் வீட்டில் வந்து உட்கார்ந்து பேசுவது தெரிந்த போது அவனை கண்டித்துள்ளார்,

அந்த பெண்ணுடன் பழகுவதில் தவறில்லை என்றாலும் அந்த பெண்ணை திருமணம் செய்து கொள்ள வருபவர்களுக்கு இப்படி பழகுவது தெரிந்தால் அவளை யாரும் திருமணம் செய்துகொள்ளமாட்டார்கள் என்பதால் இனி அந்த பெண்ணுடனான பழக்கத்தை முற்றிலுமாக விட்டு விட வேண்டும் என்று அவனுடைய அம்மா கடுமையாக விவாதம் செய்திருக்கின்றார். இதில் ஒரு முக்கிய விஷயம் என்னவென்றால், அந்த பையனின் அம்மாவின் அண்ணனின் ஒரே மகளுக்கும் இந்த பையனுக்கும் தீவிரமான காதலுண்டு, அந்த பெண்ணை திருமணம் செய்து கொள்ளும் திட்டமும் அவனுள் தீவிரமாக இருந்து வந்தது எல்லோருக்குமே தெரிந்த விஷயம். அந்த திருமணத்தை எதிர்த்தவர் அந்த பையனின் அப்பா மட்டுமே. அதற்க்குக் காரணம் அந்த பெண் படிக்காதவள், இந்த பையனின் வீட்டில் இவனைத் தவிர அவனுடன் பிறந்திருந்த இரண்டு தங்கைகள் ஒரு தம்பி உட்பட எல்லோருமே மருத்துவம் படிப்பவர்கள், இவனையும் அதிகம் படிக்க வைக்க அவனது தந்தை விரும்பியும் இவன் அதிகம் படித்தால் அந்த பெண்ணை திருமணம் செய்துகொள்ள இயலாமலே போய்விடும் என்பதால் படிப்பை பாதியிலே விட்டுவிட்டதும் உண்டு.

அன்றைக்கு தாயுக்கும் மகனுக்கும் என்னுடன் பழகக் கூடாது என்று சண்டை நடந்த பின்னர், அந்த பையன் காணாமல் போனான், அப்போது கல்பாக்கம் அணுமின் நிலைய வேலையில் இருந்தவன், அதை விட்டுவிட்டு ஊருக்குச்சென்று வன் விரும்பிய பெண்ணை அழைத்துக்கொண்டு போனவன் எங்கேயோ ஒரு மாத காலம் இருந்துவிட்டு, பின்னர் கிடைத்த வங்கி பணியில் இணைந்து அந்த பெண்ணுடனேயே குடும்பம் நடத்தி வந்தான். இன்றுவரையில் அவன் என்னுடைய நண்பன், என் கணவருக்கும் அவனை அறிமுகபடுத்தி வைத்திருக்கிறேன். இது போன்ற நண்பர்கள் பலர் எனக்கு திருமணத்திற்கு முன்னரே இருந்திருந்தாலும் என் பிள்ளைகளுக்கு ஆண்களுடன் பழகும் வாய்ப்பு அதிகம் ஏற்படவில்லை, இருந்தும் நான் எதிர்கட்சியில் அதாவது எதிர்க்கும் கட்சியிலேயே பேச விரும்பினேன், அதற்க்கு காரணம் நான் இளமையாக இருந்த காலத்தில் ஆண்களுடன் சகஜமாக பேசி பழகியதை தவறான கண்களுடன் பார்த்து வந்தவர்கள் என் திருமணத்தை நிறுத்துவதற்காக என் கணவரிடம் திருமணத்திற்கு முன்னர் அதைப்பற்றி தவறாக கூறி நிறுத்த முயன்றிருந்ததும் அதை என் கணவர் தவறாக கருதாமல் திருமணம் நடந்ததும் எனக்கு திருமணத்திற்கு பின்னர் என் கணவர் மூலம் அறிந்துகொள்ள முடிந்தது.

நாம் சரியான எண்ணத்தோடு ஆண்களோடு பெண்களும் பெண்களோடு ஆண்களும் பழகினாலும் அதை கவனிக்கும் பலர் தவறான கண்ணோட்டத்தில் பார்ப்பதை அறிந்த நான் எனது பிள்ளைகளுக்கு அந்த பிரச்சினைகள் ஏற்படக்கூடாது என்பதில் உறுதியாகவும் இருந்தேன். திருமணமான பெண்களாக இருந்தாலும் கூட சந்தேக கண்களோடு பார்ப்பவர்கள் எப்போதும் எதையும் தவறாகவே நினைப்பதும் அதனால் பலரது குடும்ப வாழ்க்கையில் பெரும் பாதிப்புகள் ஏற்ப்படுவதையும் நான் நன்கு அறிவேன் அதற்க்கு நிறைய உண்மை சம்பவங்களும் எனக்குத் தெரியும் என்பதால் எதிர்க்கும் அணியில் நான் பேச விரும்பினேன். ஆனால் அவர்கள் ஏற்கனவே திட்டமிட்டிருந்தபடி எதிரணிக்கே அதிகமாக பேச வாய்ப்பளித்து சிறப்பு பரிசும் வழங்கினார்கள்.

சமுதாயத்தை எதிர்த்து நிற்ப்பதோ புரட்சி செய்வதோ தனி நபரால் கூடாத காரியம், பெருவாரியான மக்கள் எதை ஏற்றுக்கொள்கின்றார்களோ அதையே வழக்கமாகவும் சரியானதாகவும் உறுதிபடுத்தி பின்பற்றியும் வருகின்றனர், சமுதாயத்திற்கு எதிராக எந்த சம்பவம் நடந்தாலும் அது தோற்றுபோவதன் காரணமும் இதனால்தான். அதுமட்டுமில்லாமல் தனக்கொரு நீதி அடுத்தவர்க்கு ஒரு நீதி என எண்ணி செயல்படும் மக்களைக் கொண்ட சமூக அமைப்புதான் நடைமுறையில் உள்ளது என்பதாலும் கூட இத்தகைய விபரீதங்கள் நிகழ்கின்றன, விவாதத்திற்கும் ஏட்டிற்கும் வேண்டுமென்றால் பல விஷயங்கள் சரியானதாகவும் புரட்சி மிக்கதாகவும் கருதப்படலாம் ஆனால் நடைமுறைக்கு அவை ஒத்து போவதே இல்லை என்பதே எனது வாதம்.


@@@@@@@@@@

10/29/2010

சொல்

சூளையில் சுட்ட மண்
செங்கலானது
புகை நெருப்பில்
வெந்த நெல்
உணவானது

நாவினால் சுட்ட
புண் நெஞ்சில்
ரணமானது
வெஞ்சினமானது
மீளாத் துயரானது

நெடு நாள் ரணமான
சுடு சொற்கள் பின்
மறையா வடுவானது
மாறா நினைவானது

கடற் கரை
ஈரம் காய
அலையனுப்பும்
உப்பு நீருண்டு
மண் உலராமல்
காக்க தவறாத
வான் மழையுண்டு

நெஞ்சுலரா உன்
சொற்கள் மட்டும்
செவி வழியே
உட்சென்று
சுடு சொல்லாய்
கடும் சொல்லாய்
ஈர நெஞ்சை
உலர்த்திவிடும்
கொடுமைதான் ஏன் மனிதா

##########

சட்டம் எங்கே

விபச்சாரம் என்பதை பற்றி பேசுகின்ற போது விபச்சாரி என்ற பெண்பாலைப் மட்டுமே உபயோகிப்பது காலம் காலமாய் தமிழ் நாட்டில் மட்டுமில்லாது உலக மனித சமுதாயம் குறிப்பிட்டு வருவதை நம்மால் காண முடிகிறது. விபச்சாரிக்கு ஆண்பால் என்பதே இலக்கணத்தில் கிடையாது, ஆயிரம் ஆண்டுகள் கடந்தாலும் விபச்சாரி என்பது பெண்ணை குறிக்கும் சொல்லாகவே நடை முறையில் இருந்து வருவது எதை காட்டுகிறது. விபச்சாரத்திற்கு பயன்படும் முக்கிய பொருள் பெண் என்பதாலா அல்லது பெண் என்பவள் படைக்கப்ப்படும்போதே ஆணுக்கு கீழே, ஆணால் ஆளப்படுபவளாக தோற்றுவிக்கபட்டவள் என்பதாலா, இப்படி பல கேள்விகள் எழுவதும் காலம் காலமாய் அவை பதிலுக்கு காத்து கிடக்கின்ற மாற்ற இயலாத நிரந்தரமாகி இருப்பதும் வினோதம்.

பெண் இன விருத்தி செய்வது இயற்கையால் அவளுக்கு கொடுக்கப்பட்ட வரமென்றே பெருமையாய் கூறிக்கொண்டாலும், இயற்கையில் இன விருத்தி செய்யும் விலங்குகள் பறவைகள் ஏன் மரம் செடி கொடி வகைகளும் கூட உண்டு, அவை பெண்களை விபச்சாரத்திற்கு பயன்படுத்துவதில்லை. விபச்சாரம் என்பது மனிதகுலத்தில் மட்டுமே நிலவுகின்ற கொடுமை. பெண் தன் பெண்மையை எப்படி விலை பேச ஆரம்பித்தாள், இதற்கும் முன்னோடிகள் ஆண்களாகத்தான் இருந்திருக்கின்றனர். தனது உடற் பசியை தீர்க்க பெண்ணை தேடி போகின்ற ஆணிடமிருந்து தன் சுய தேவைகளை பூர்த்தி செய்து கொள்ளும் எண்ணம் எவ்வாறு வந்தது, ஆண் வேட்டையாடுபவன், மரத்தின் மீதேறி காய் கனிகளை கொய்து வருபவன், கிழங்குகளை தோண்டி எடுப்பவன், அவனிடமிருந்து அந்த பொருட்களை பெற்றுக்கொள்வதற்கு பண்டமாற்று பொருளாகியது பெண்மை.

ஆதிகாலத்தில் கூட்டம் கூட்டமாக வாழ்ந்த மனிதர்கள் ஒரு கூட்டத்தில் இருக்கும் பெண்களிடம் அந்த கூட்டத்தில் இருந்த ஆண்கள் புணருவதில் தொடங்கி அடுத்த கூட்டத்தில் இருக்கும் பெண்ணை புணரும் போது இரு கூட்டத்திற்கும் சண்டைகள் ஏற்பட்டன, ஒரே கூட்டத்தில் இருக்கும் ஒரே பெண்ணை பலரும் புணர்ந்த போது, ஆண்களுக்குள் சண்டைகள் போட்டிகள் ஏற்படத் துவங்கியது. அவ்வாறு போட்டிகள் ஏற்பட்டு சண்டைகள் நடந்த போது சண்டையிட்டு பெண்ணை தனதாக்கிக் கொண்ட ஆணை அக்கூட்டத்தினர் வீரன் என்று கூறி பெருமை கொண்டனர், அவனால் கொடிய மிருகங்களை அடக்க அல்லது மேற்கொள்ள முடிந்த போது அவனை அக்கூட்டத்தின் தலைவனாக்கினர்.

பல ஆயிரம் ஆண்டுகள் கடந்த பின்னரே திருமண முறைகளை கண்டு பிடித்து ஒரு பெண்ணுக்கு ஒரு ஆண் வீதம் சீர்திருத்தங்கள் செய்யப்பட்டன. பெண் தங்களை போகப்பொருளாக்குபவரிடம் கைமாறாக வீடு நிலம் உணவு தானியங்கள் என பெற்று வாழ்க்கை நடத்திய காலத்தில் அத்தகைய பெண்டிரிடம் ஊரில் இருந்த பலரும் தொடர்புகொள்வது என்பதும் அவள் ஊரின் ஆடவர்களுக்கு பொது பொருளாக்கபட்டதும் நாம் காணும் பல வரலாறுகளில் உண்டு. அத்தகைய பெண்களை கீழ்தரமானவள் என்றும் முத்திரை குத்தப்பட்டது, அவளிடம் ஊரில் உள்ள வேற்று பெண்கள் பேசுவதும் பழகுவதும் கூட தவறு என்று எண்ணி ஒதுக்கி வைத்த காலங்கள் உண்டு. பெண்களை தன் சுகத்திற்க்காக உபயோகிப்பவர்களை பற்றி இழிவாக எண்ணாத சமூகம் அதற்க்கு துணையாய் இருந்த பெண்ணகளை மட்டும் இழிவாக எண்ணி இழிவாக பேசி ஒதுக்கியது.

விபசாரம் என்பதை தற்காலத்தில் சட்ட விரோத செயலாக கொண்டு விபசாரிகளை சட்டத்தின் மூலம் தண்டிக்கவும் வழிவகை செய்யப்பட்டுள்ளது. விபசாரியை மட்டும் தண்டனைக்குள்ளாக்குவதில் என்ன நியாயம் இருக்கிறது என்ற கேள்வி எழ நாளடைவில் விபசாரத்தில் ஈடுபடுகின்ற ஆண் பெண் இருவரையும் சட்டத்தில் தண்டிக்க வழி வகை செய்யப்பட்டுள்ளது. அயல் நாடுகளில் விபசார தடுப்புச் சட்டம் என்பது அமலாக்கபட்டிருந்தாலும் எல்லா நாடுகளிலும் ஒரே மாதிரியான சட்டங்கள் கிடையாது, குறிப்பிட்ட சில நாடுகளில் திருமணமாகாத இருவர் உடலுறவில் ஈடுபடுவதை சட்டம் குற்றம் என்று வரையறை செய்துள்ளது. நமது இந்திய தேசத்தை பொறுத்தவரையில் இரு திருமணமாகாத நபர்கள் உடலுறவில் ஈடுபடுவதை விபசாரம் என்று கூறி சட்டத்தில் தண்டிக்க வாய்ப்பளித்திருப்பதை அறிவோம், ஆனால் பல நயவஞ்சகர்களால் இந்த சட்டம் பழிவாங்கும் ஆயுதமாக பயன்படுத்தப்பட்டு சம்பந்தமே இல்லாமல் பலர் கைது செய்யப்படுவதும் தண்டிக்கப்படுவதும் தொடர்கதை.

சட்டத்தையும் நீதியையும் மதிக்கின்ற நாம் இத்தகைய அட்டுழியங்களை கண்டும் காணாதவர்கள் போன்று இருப்பதும் வாடிக்கை, அவரவர்க்கு வந்தால்தான் பிரச்சினையே தவிர அடுத்தவர்க்கு வரும்போது நமக்கென்ன என்ற மெத்தன போக்கு நமது சமுதாயத்தில் ஒன்றிவிட்ட போக்கு. சட்டங்கள் அத்தனையும் சமுதாய நலன் கருதியே அமலாக்கப்படுவது ஜனநாயகத்தின் மிகப்பெரிய அற்புதம், பலம், ஆனால் அச்சட்டங்களை பலர் தங்களது சுய விருப்பு வெருப்பிற்க்கேர்ப்ப பயன்படுத்துவதை சட்டம் தடுத்து நிறுத்தி தண்டிக்காமல் இருப்பது ஜனநாயகத்தின் குருட்டாட்டம் என்றே கூற முடியும். விபச்சாரிகளை நியாயப்படுத்தும் பலரும் கூட இத்தகைய குருட்டாட்டத்தில் மிக முக்கிய பங்கு வகிப்பதை எந்த சட்டத்தாலும் தண்டிக்க இயலாமல் முடக்கப்படுவது ஜனநாயகத்தை கொடூரமாக கொலை செய்வதற்கு நிகர்.

'சட்டத்தின் முன் எல்லோரும் சமம்' என்று பலகைகளிலும் ஏடுகளிலும் எழுதி வீர வசனம் பேசுகின்ற பலர், 'ஒரு நிரபராதி கூட தண்டிக்கபடக்கூடாது' என்று முழக்கமிடும் பலரும் ஜனநாயக படுகொலைகாரர்கள் பட்டியலில் இருப்பதை காணுகின்ற போது ஜனநாயக நாட்டில்தான் நாம் வாழுகின்றோமா இல்லையா என்கின்ற சந்தேகம் எழுவது நிச்சயம். ஜமீன்தார் அல்லது அரசன் ஆட்சி காலத்திற்கும் ஜனநாயக நாட்டில் வாழ்வதற்கும் என்ன வித்தியாசம். சட்டம் யார் கைபிள்ளை, பணம் படைத்தவரின் கையிலா, அல்லது பெரிய பொறுப்பு வகிப்பவர்களின் கையிலா, எடுத்தவர் கைபிள்ளையாகும் சட்டம் ஜனநாயகத்தின் விளையாட்டுப்பொருளா. சட்டத்தை தங்கள் கையிலெடுப்பவர்களே விபசாரிகள். சட்டம் தன் கடமையை செய்யும் என்று காத்து கிடப்போருக்கு எங்கே நீதி கிடைக்கும் மன்னர் ஆட்சியிலா ஜனநாயகத்திலா.


******************

10/28/2010

நல்ல பேரை வாங்க வேண்டும் பிள்ளைகளே

"ஒழுக்கம் விழுப்பந் தரலான் ஒழுக்கம்
உயிரினும் ஓம்பப் படும்"

சிக்கனம் என்பதைப் பற்றி எழுதத் துவங்கிய நேரமோ என்னவோ தெரியவில்லை தொடர்ந்து எழுத இயலாமல் போனது, சிக்கனத்திற்க்கும் சேமிப்பிற்கும் நிறையவே சம்பந்தம் உண்டு, சில கருமிகள் எச்சில் கையினால் காகத்தை கூட துரத்த பயப்படும் நபர்களுக்கு பணம் சேருவதும் உண்டும், ஒரு பழைய மொழி உண்டு 'இறைக்கின்ற கிணறுதான் சுரக்கும்' என்பார்கள், ஆனால் இறைத்துக்கொண்டே இருந்தால் காய்ந்து போகும் நிலைதான் தற்காலத்தில் காணப்படும் நிலையாக உள்ளது, சிலர் சிக்கனமாக இருக்க வேண்டும் என்று முயற்சிகளை மிகவும் கஷ்டப்பட்டு செய்து பார்க்கும் போதுதான் என்றைக்கும் இல்லாத அதிக செலவினங்கள் ஏற்பட்டு கையில் ஒரு பைசா கூட இல்லாமல் போவதும் உண்டு, இதற்க்கெல்லாம் நாம் காரணமில்லை,

சிக்கனக்காரர்களிடம் பணம் தங்குவதை நம்மால் காண முடிகிறது, சிக்கனத்திற்க்கும் கருமிக்கும் என்ன வித்தியாசம், ஒன்றையும் சாப்பிடாமல் எங்கேயாவது ஓசி சாப்பாடு கிடைக்குமா என்று அலைந்து கொண்டு தன் கையிலிருக்கும் பணத்தை தனது பசிக்காக செலவழிக்க தயங்குபவன் கருமி, சிக்கனம் என்பது, கையிலிருக்கும் இருப்பிற்க்கேர்ப்ப செலவு செய்து அன்றைய பசியை ஆற்றி அடுத்த நாளைக்கும் மீதம் எடுத்து வைப்பவர் சிக்கனக்காரர். இதில் ஒரு விஷயம் என்னை சிந்திக்க வைப்பதுண்டு, தன் கை காசை செலவழித்து வயிற்று பசியை தீர்க்காத தனது பணம் வேறு எதற்கு என்பதும், அவ்வாறு கருமித்தனம் செய்தே கோடிகளை சேமித்து வைக்கும் பணக்காரர்களும் நிறையவே உண்டு என்பதும் உண்மை.

பணமும் காசும் சிக்கனக்காரர்களிடமும் கருமிகளிடமும் மட்டுமே தங்கும் இயல்பை கொண்டதாக காணப்படுவது ஏன், சில பணக்கார வீடுகளில் வேலைக்காரர்களுக்கு குடிப்பதற்கு காப்பி அல்லது தேநீர் கொடுப்பதாக வாக்குக்கொடுத்திருந்தால் வெல்லம் போட்ட தேநீரையே பருக கொடுப்பது, நியாய விலைக்கடையில் வாங்கிய அரிசியில் சமைத்த சோற்றை உண்ண கொடுக்கும் கொடூரங்களும் உண்டு. இப்படிப்பட்டவர்களை கருமியில் சேர்த்துக்கொள்ளலாம், இவர்களிடம்தான் பணம், பொருள், நகை, நிலம், வீடு என்று ஐஸ்வரியங்கள் எல்லாமே வந்து குவிந்து கிடப்பதைக் காணுகின்ற போது என் கற்பனையில் தோன்றுவது, கையெல்லாம் குஷ்டரோகத்தினால் பழுத்துக் துர்நாற்றம் வீசுகின்ற ஒருவர் மிகவும் சுவையான பிரியாணி அல்லது வேறு சுவையான உணவை பரிமாறுவது போன்றது,

காசும் பணமும் கருமியிடம் சேர்வதின் பொருளென்ன, நீர் பள்ளத்தில் சேரும் ஆனால் அந்த நீர் பூமியையும் அதன் அருகில் உள்ள தாவரங்களுக்கும் மிருகங்களுக்கும் ஏன் மனிதர்களுக்கும் கூட பெரும் உதவியாக இருப்பதுண்டு, ஆனால் கருமியின் பொருள் வேறு ஒரு சோம்பேறியிடம் சென்றடைவது வழக்கம், இந்த சோம்பேறிகள் யார் என்பதை கவனித்தால், கருமிகளால் உருவாக்கப்பட்ட அவர்களது வாரிசுகள், அல்லது வாரிசுகளே இல்லாத கோவில் சொத்தாக மாறுகின்ற வாய்ப்பை பெறுகின்ற ஐஸ்வரியங்கள், ஐஸ்வரியத்தை அடைவதற்காகவே காத்திருந்த உறவினர்கள் என்று கருமி அடைகாத்த பொருள் அத்தனையும் சென்றடையும் இடம் மிகவும் மோசமானதாகவே காணப்படுகிறது.

சிக்கனம் செய்து சேமித்த பணம் பொருள் நகை வீடு நிலம் எதுவாக இருப்பினும் பல சந்தர்ப்பங்களில் சேமித்தவரின் உடல் நலன் மற்றும் பலவித தேவைகளுக்கு பயன்படுவதை யாராலும் மறுக்க இயலாது. சிக்கனம் கருமித்தனம் இவற்றைத்தவிர வேறு ஒன்று உண்டு அது இவற்றிக்கு முற்றும் எதிரான ஆடம்பரம், சிலர் வரும்படிக்கு அதிகமாக செலவழித்து தங்களது அந்தஸ்த்தை உயர்த்தி காண்பிக்க பெரும்பாடுபடுவார்கள், சிலர் அடுத்தவருக்கு காண்பிப்பதற்காக இல்லையென்றாலும் வரவை விட அதிகம் செலவழித்தே கடன்காரனாகி அவதியுறும் நபர்களும் உண்டு, இவர்களை திருத்துவது இயலாத காரியம், இவர்களை நம்பி இருக்கும் குடும்பத்தின் கதி அதோ கதிதான், இந்த கெட்ட பழக்கம் வாலிபபருவத்திலேயே இவர்களிடம் தேடிவந்து ஒட்டிக்கொள்ளும், இன்னும் சிலர் சிறு வயது முதலே வீட்டில் திருடி அக்கம்பக்கத்தில் கிடைத்த பொருட்களை எடுத்துச் சென்று விற்று ஆடம்பரத்தை அல்லது தன் விருப்பங்களை நிறைவேற்றிக் கொண்டு தீய பழக்கத்திற்கு அடிமைகளாகி விடுகின்றனர்.

பெற்றோர்கள் குழந்தைப் பருவம் முதலே இத்தகை செயல்களை கண்டு பிடித்து திருத்தாவிடில் இவர்களது நிலைமை சமூக விரோதிகளை உருவாக்கும். சிக்கனம் சேமிப்பு, ஆடம்பரம், தேவைக்கு ஏற்ப செலவழித்தல், கருமித்தனம் இவை எல்லாமே பொருளாதாரத்தை சார்ந்து இருப்பதால் அடிப்படை காரணம் தனிப்பட்ட நபரின் சிறு வயது முதலே கற்றுக்கொடுக்கப்பட வேண்டிய நல் ஒழுக்கங்களில் இவைகளும் மிகவும் முக்கிய பங்கு வகிப்பவை என்பதை பெற்றோர் நன்கு உணர வேண்டும், பிறவியிலேயே கருமியாகவும் ஆடம்பரமாகவும் பிறக்கும் நபர்களும் உண்டு எவ்வாறிருந்தாலும் ஒருவரின் வளர்ப்பு முறை என்பது எந்த பழக்க வழக்கத்திற்கும் மிகவும் அடிப்படையான சிறந்த காலம் என்பது உறுதி.

சிறந்த மனிதர்களை உருவாக்குகின்ற முக்கிய பொறுப்பு ஒவ்வொரு பெற்றோருக்கும் ஆசிரியர்களுக்கும் உண்டு தன் கடமைகளை ஒழுங்காக நிறைவேற்றினால் சிறந்த எதிர்கால தலை முறைகள் உருவாகும் வாய்ப்பு உண்டு.

<><><><><><><><><><><>

10/15/2010

சிக்கனம்

சிக்கனம் என்பதற்கு முழுமையான விளக்கமளித்து வாழ்ந்துகாட்டுவதில் முதலிடம் வகிப்பவர்கள் பெரும்பாலும் பெண்கள். ஆண்களில் சிக்கனக்காரர்களே இல்லை என்று சொன்னால் அது என் அறியாமையை காண்பிக்கும், ஆண்களிலும் சிக்கனக்காரர்கள் உண்டு, ஆனால் ஆண்களில் சிக்கனக்காரர்கள் தங்களது சொந்த தேவைகளுக்கும் அனாவசியத்திற்க்கும் கணக்கு வழக்கின்றி தாங்களே செலவழித்து விட்டு வீட்டில் உள்ள பெண்களிடம் சிக்கனமாக இருக்கத் தெரியவில்லை என்ற புகாரை கூறி அடிக்கடி குடும்பத்தில் சண்டையிடும் சிக்கனக்காரர்கள் உண்டு. சிக்கனம் என்றாலே நமது கண் முன் தெரிவது பொருளாதாரம் மட்டுமே. ஆனால் சிக்கனம் என்பது மனிதனுக்கு எல்லா விதத்திலும் அத்தியாவசியமானது என்பதை பலரும் அறிவது இல்லை.

பூமியில் சீதோஷ்ண நிலையில் ஏற்ப்பட்டிருக்கும் அதிக வெப்பத்தின் காரணமாக பூமியில் இருக்கும் நீரின் அளவு கணிசமாகவே குறைந்து வருவதை எல்லோரும் அறிந்திருந்தாலும் காவிரி நீர் திறக்கவில்லை என்று கோஷமிடுவதற்க்காக வரிந்து கட்டிக்கொண்டு கிளம்புகின்ற அதே சமயம் இருக்கும் நீரை அல்லது கிடைக்கின்ற நீரை எப்படி சிக்கனமாக பயன்படுத்த வேண்டும் என்பதை அடியோடு மறந்துவிட்டு செயல்படுகின்ற அடி முட்டாள்கள் நிறைந்திருக்கும் நாடு நமது இந்திய தேசம் என்றால் அது மிகையில்லை.

பொருளாதார சிக்கனத்திற்கு தன்னைத் தவிர வேறு ஒருவர் உதாரணமாக இருக்க இயலாது என மார் தட்டிக்கொள்ளும் பலரும் சமயலறையில் புளி முதல் எரிவாயு வரையில் எல்லாவற்றிலும் சிக்கனத்தை மறவாமல் கடை பிடிக்கும் 'சிக்கனப் புலிகள்' பெரும்பாலும் தங்கள் வார்த்தைகளில் சிக்கனமாக இருப்பதில்லை. அடுத்த நபர் தொடங்கி தனது கணவர் அல்லது மனைவி வரை ஒருவரிடத்திலும் தங்களது 'வார்த்தைகளை' பிரயோகிப்பதில் சிக்கனமாக இருக்க வேண்டுமென்கின்ற வரம்புடையவர்களாக இருப்பதில்லை, நாக்கும் வாயும் நிரம்ப பேசுவதற்குத்தான் படைக்கபட்டிருக்கிறது என்றாலும் அடுத்தவர்களின் மனதை புண்படுத்தி சித்தம் கலங்கச் செய்ய முடியுமோ அத்தனை வேகத்தில் அணுகுண்டையும் மிஞ்சுகின்ற அளவிற்கு வார்த்தை பிரயோகம் செய்வதில் துஷ்டர்களாக, தங்களை மட்டுமே அறிவு ஜீவிகளாக எண்ணி மகிழ்கின்ற 'தாராளம்' நிறைந்தவர்கள் எண்ணிக்கை நிறைய உண்டு.

சிக்கனமாக இருப்பது என்பது சிறந்த குணமாக கருதப்பட்டாலும் எதில் எப்போது எங்கேயெல்லாம் சிக்கனமாக இருக்க வேண்டுமென்பதை அறிந்திருந்தால் மட்டும் போதாது அதன்படி நடக்கவும் வேண்டும். கருமிகளை யாரும் விரும்புவதில்லை, சிக்கனமாக இருப்பவர்களை விட கருமியாக இருப்பவர்களின் தொல்லை இன்னும் மோசமானது, எனக்குத் தெரிந்த ஒரு அம்மாள் கருமி, அவர் தனது வீட்டை சுத்தம் செய்யும்போது வீட்டிலிருக்கும் மிச்சம் மீதியான மருந்து மாத்திரைகளையெல்லாம் சாப்பிட்டு விடுவார், காசு கொடுத்து வாங்கிய பொருள் வீணாவதை அவர் விரும்புவதில்லை என்பார். நான் அவர் வீட்டிற்கு அவரை சந்திக்க சென்ற போது இனிப்பு பலகாரங்களை வாங்கிச் செல்வது வழக்கம், சிறிது கால இடைவெளிக்குப்பிறகு மீண்டும் சென்ற போது வேறு தின் பண்டங்களை வாங்கிச் சென்றேன் எல்லாவற்றையும் எடுத்து உள்ளே வைத்துவிட்டு வந்தவர் கையில் நான் ஏற்கனவே பல மாதங்களுக்கு முன்பு வாங்கிச் சென்ற இனிப்புகளை எடுத்து வந்து என்னிடம் காட்டி அவரது கடைசி மகள் போபாலிலிருந்து வருவதாக கடிதம் எழுதி இருப்பதால் அவளுக்கு கொடுப்பதற்காக அப்படியே எடுத்து வைத்திருப்பதாக கூறினார்.

அவை எல்லாம் கெட்டுவிடுமே என்றேன் நான், எனக்கு நீரிழிவு வியாதி அதனால் இவைகளை சாப்பிட முடியாது என்றார், என்னிடம் சொல்லியிருந்தால் இனிப்புகள் வாங்கி வருவதை தவிர்த்து வேறு ஏதாவது வாங்கி வந்திருப்பேனே, வீட்டில் உங்களுடன் தங்கியிருக்கும் கடை குட்டி மகனுக்கு இனிப்புகளை கொடுத்து சாப்பிட சொல்லக் கூடாதா என்றேன், அதற்கு அவர் அந்த பையன் வேலையில்லாமல் தண்டச் சோறு சாப்பிடுகிறான் இதில் இனிப்புகளை கொடுத்து சாப்பிட சொன்னால் என் தலை மீது உட்கார்ந்து விடுவான் என்றாரே, இப்படியெல்லாம் கூட மக்கள் இந்த உலகில் வாழுகின்றார்களா என்று எண்ணி எனக்கு ஆச்சரியமாக இருந்தது. அவரது தோட்டத்தை சுற்றி பார்த்துக் கொண்டிருந்த போது அங்கே காய்ந்த தென்னை மட்டைகள், தேங்காய் மட்டைகளை குவியலாக சிறு மலை போல குவித்து வைத்திருந்ததை பார்த்து இவைகளை ஏன் இங்கே சேமித்து வைத்திருக்கின்றீர்கள் பாம்பு வந்து புகுந்து கொண்டுவிடுமே என்றேன்,

அதற்க்கு அவர் ஏற்கனவே வாடிக்கையாக ஒரு சர்ப்பம் பல ஆண்டுகளாக வந்து போய்க் கொண்டுதான் இருக்கிறது, அதைத்தவிர நிறைய பாம்பு கதைகளும் இங்கு உண்டு, பாம்பு என்னை தீண்டி நான் சாகமாட்டேன் என்பது எனக்குத் தெரியும், இதே போன்ற ஒரு போர் தென்னைமரக் கழிவுகளைக் கொண்டுதான் என் கணவர் இறந்த போது அவரது சடலத்தை மயானத்தில் எரிக்க உபயோகித்தேன், இப்போது நான் சேமித்து வைக்கும் இந்த தென்ன கழிவுகளை நான் இறந்தால் என் சிதைக்கு தீ வைக்கும்படி என் மகனிடம் ஏற்கனவே சொல்லி வைத்திருக்கிறேன் என்றார். இப்படியெல்லாம் சிக்கனமாக இருக்கும் கருமிகளை பற்றி இன்னும் வரும் நாட்களில் தொடர்ந்து எழுதுவேன்.

()()()()()()()()()()()()()()()()()()()()()

10/14/2010

அன்புள்ள கணினிக்கு


பனிரெண்டு வருடங்களாக உலகை என்னறைக்குள் எடுத்துவந்த எனது முதல் கணிணி கொஞ்சம் கொஞ்சமாக அதன் உழைக்கும் திறனை இழந்து வந்து என்னுடனான உறவை முடித்துக்கொள்ள தயாராகியது. எத்தனைவிதமான மனிதர்களை, உணர்வுகளை, செய்திகளை எனக்கு பகிரங்கமாகவும் ரகசியமாகவும் தெரிவித்து உணர்த்தி என் வாழ்க்கையில் இனி கணினியின்றி இயலாதென என்னுடன் இரண்டற கலந்துவிட்ட உயிரற்ற ஜடப்பொருட்களில் ஒன்றாகி இயங்கி வந்த, இருபதாம் நூற்றாண்டின் இணையற்ற இயந்திரமென்கின்ற கணிணி என்னை விட்டு பிரியா விடை பெற்று பிரிந்தது.

இதற்க்கு முன் சலவை இயந்திரமொன்றும் ஏறக்குறைய பதினைந்து வருடங்களாக என்னுடன் அயராமல் இயங்கி வந்த சடப்பொருள் ஒன்று என்னைவிட்டு பிரிய நேர்ந்த கதையும் உண்டு, மனிதர்களைவிட மிகவும் சரியாக தங்களது பணியை தவறாமல் செய்வதில் இயந்திரத்திற்கு ஈடு இணை கிடையவே கிடையாது. நம்முடன் வெகு காலம் பழகிய, உதவிய மனிதர்களை விட்டு முழுவதுமாக பிரிவதையே பெரிதாக எண்ணாத இயந்திர கதியாய் போன மனிதர்களுக்கிடையே, இயந்திரம் என்கின்ற சாதனம் எத்தனை வருடங்கள் உழைப்பை நமக்கு சிறப்பாய் கொடுத்திருந்தாலும் அதனை பிரிவதில் ஒன்றும் பெரிதாக வருத்தப்பட மனிதர்கள் இல்லை என்பதை காணும் போது இயந்திரத்திற்கும் மனித மனங்களுக்கும் என்ன பெரிய வித்தியாசம் என்று தான் நினைக்கத் தோன்றுகிறது.

நான் ஒன்பதாம் வகுப்பில் படித்துக்கொண்டிருந்த போது என் பக்கத்தில் உட்காருகின்ற பெண் அடிக்கடி புதிய எழுதுகோல்களை பள்ளிக்கு எடுத்து வருவது வழக்கம் அவ்வாறு ஒரு முறை அழகிய எழுதுகோல் ஒன்றை எடுத்து வந்தாள், அந்த எழுதுகோலை புத்தகங்களை வைக்கும் அறையில் வைத்தவள் திரும்பவும் எடுத்துச் செல்லவில்லை, அந்த பெண்ணிற்கும் எனக்குமான பொதுவான புத்தக அறை என்பதால் அந்த எழுது கோல் அவளுடையது என்று சொல்லி அதனுள்ளிருந்து எடுத்து அவளிடம் கொடுத்த போது அது தன்னுடையது இல்லை என்று சொல்லி திரும்பவும் வாங்க மறுத்தாள், வேறு வழியின்றி அந்த எழுது கோலை நான் எடுத்து உபயோகித்தும் வந்தேன், மிகவும் அருமையாக எழுதிய அந்த எழுதுகோலை பள்ளியிறுதி தேர்வுவரை உபயோகித்து வந்தேன், ஆனால் அந்த பெண்ணுக்கு சித்தத்தில் மாறுதல் ஏற்பட்டதன் விளைவாக ஒன்பதாம் வகுப்பிற்கு பின்னர் பள்ளிக்கு வருவது நின்று போனது. எழுதுகோலையும் அந்த பெண்ணையும் என்னால் இன்றுவரையில் மறக்க இயலவில்லை. அவள் மிகவும் அமைதியான குணம் கொண்ட பெண், ஆனால் ஒன்பதாம் வகுப்பில் படிப்பதற்குரிய வயதைவிட மிகவும் அதிக வயதுடைய பெண்ணாகவும் அதற்குரிய உடற் வளர்ச்சியையும் கொண்டவளாக காணப்படுவாள்.

முதல்
முதலாக புதிய கணிணி வாங்குவதற்கான காரணமாக இருந்தது எனது மூத்த மகள், அவளது பள்ளி தலைமையாசிரியை என்னையும் என் கணவரையும் பள்ளிக்கு அழைத்திருந்தார், அங்கு சென்றபோது பத்தாம் வகுப்பில் பள்ளியில் அதிக மதிப்பெண்களை வாங்கிய மாணவிகளுக்கு அவரவர் விருப்பத்திற்கிணங்க பதினோராம் வகுப்பில் சிறப்பு பாடம் எடுத்து படிப்பதற்கான தகுதி உடையவர்களாக தேர்வு செய்து அந்த மாணவிகளின் பெற்றோர்களிடம் அந்த மாணவிக்கு தேவையான எல்லாவித வசதிகளையும் ஏற்ப்படுத்திக் கொடுத்து ப்ளஸ் டூ என்கின்ற பள்ளியிறுதி தேர்வில் அதிக மதிப்பெண் பெறுவதற்கு ஒத்துழைப்பு கொடுப்பதற்கான ஆலோசனை வழங்க பெற்றோர்களை அழைத்திருந்தார்.

கம்ப்யுடர் சயின்ஸ் என்கின்ற பாடத்தை சிறப்புப்பாடமாக எடுத்து படிக்க விருப்பம் தெரிவித்திருப்பதால் கணினியும் அதற்க்கு தேவையான மென்பொருட்களையும் வாங்கி கொடுத்து மாணவி சிறந்த மதிப்பெண் பெற உதவி செய்ய தலைமையாசிரியர் எங்களிடம் சொன்ன காரணத்தால் முதல் கணிணி எங்கள் வீட்டிற்கு உடனே வாங்கப்பட்டது. ஆனால் அந்த கணினியில் பெரும்பாலான சமயங்களில் நான் மட்டுமே நிறைய கற்றுக்கொள்ளுகின்ற வாய்புகள் கிடைத்தது. முதல் கணிணி வாங்குவதற்கு முன்பே கம்ப்யுடர் வகுப்பில் (NIIT) சேர்ந்து கணினியை உபயோகிக்கும் முறைகளைப்பயின்று தேர்ச்சி பெற்றிருந்தேன் ஆனால் அங்கு நான் செய்முறை விளக்கமாக அறிந்தது மிகவும் குறைவே. மகளுக்காக வாங்கிய கணினியில் எனது ப்ராக்டிகல் மிகவும் வெற்றிகரமாகவே நடந்தது. கற்றபோது அறிய இயலாத பலவற்றை ப்ராக்டிகல் சொல்லிக்கொடுத்தது.

அதைத்தவிர இன்டர்நெட் என்கின்ற உலகளாவிய வலையில் எத்தனை விதமான மனிதர்கள். அவர்களின் சிறப்புக்களை அறிவதைவிட ஏமாற்று வேலைகள், பழி தீர்க்கும் மனிதர்கள், அடுத்தவரை கெடுக்க எத்தனை விதமான கபட நாடகங்கள், செக்ஸ் என்கின்ற பெயரில் எத்தனை ஆபாசங்கள், சொல்லி முடியாத மற்றும் சொல்லுக்குள் அடங்காத மனித வக்கிரங்கள் எத்தனை எத்தனை. முகம், விலாசம் தெரியாது என்பதால் மனிதர்களின் எல்லையற்ற வக்கிரங்களின் உச்ச கட்ட செயல்களின் வெளிப்பாடுகள் என வலையுலகம் முழுவதும் நிறைந்து கிடக்கும் மனிதர்களின் பிம்பங்கள். இவையனைத்தையும் எனக்கு இதுநாள் வரையில் எடுத்துக் காட்டி வந்த என் முதல் கணிணி. என்னால் என்றும் மறக்க இயலாத முதல் கணிணி.


++++++++++++++++++++++++

10/06/2010

இந்தியாவிற்கு 11 தங்கப்பதக்கங்கள்


காமன் வெல்த் விளையாட்டுகளில் இன்றைய நிலவரப்படி இந்தியாவிற்கு 11 தங்கப்பதக்கங்கள் கிடைத்திருக்கிறது, தனது தாய்நாடு பெருமையடைகிறது என்றால் அந்நாட்டு குடிமக்கள் எல்லோருக்கும் அந்த செய்தி மகிழ்ச்சியானதுதான், அதில் யாருக்கும் எப்போதும் மாற்று கருத்துக்கள் இருக்க வாய்ப்பில்லை. ஆனால் ஆசிய விளையாட்டுகளிலோ ஏற்கனவே நடந்த காமன்வெல்த் விளையாட்டுகளிலோ இந்திய விளையாட்டு வீரர்கள் இத்தனை பேர் ஒட்டு மொத்தமாக தகுதி பெற்று போட்டிகளில் விளையாட முடிந்ததும் இல்லை, அப்படியே தகுதி பெற்று விளையாடி இருந்தாலும் தங்கப்பதக்கங்களை இந்த அளவிற்கு வாங்கி குவித்ததில்லை என்பதை யாராலும் மறுக்க இயலாது.

விளையாட்டு வீரர்களை தனது சொந்த நாட்டிலேயே விளையாட வாய்ப்பளிக்காமல் விட்டுவிடக் கூடாது என்பது காரணமா, அல்லது போட்டியின் விதிகளை விட்டு விலகி இந்திய விளையாட்டு வீரர்களுக்கு தனிப்பட்ட சலுகைகள் வழங்கப்படுகின்றனவா என்பது கேள்விக்கு இடமாக உள்ளது. இன்னொரு கோணத்தில் பார்க்கும்போது கோச் [coach] என்பவர்கள் வெளிநாடுகளைச் சேர்ந்த வித்தகர்களாக வரவழைக்கப்பட்டு இந்திய வீரர்களுக்கு சிறப்பு பயிற்சிகள் வழங்கப்பட்டனவா என்ற கேள்வி எழுந்தாலும் மல்யுத்தம், குத்துச்சண்டை, துப்பாக்கி சுடுதல் போன்ற விளையாட்டுகளில் விளையாட்டு வீரர்களுடன் இந்திய பயிர்ச்சியாளர்களையே காண முடிந்தது [ஒரு சில விளையாட்டுகளைத்தவிர].

நம்ம
ஊர் மக்களுக்கு நம்ம ஊர் வீரர்கள் வெற்றியடைய வேண்டும் என்கின்ற ஆதங்கமும் ஆர்வமும் வீரர்களை ஊக்கப்படுத்துகின்ற முயற்ச்சிகளும் தேவைதான், அதற்காக வேற்று அணியினர் சிறப்பாக விளையாடுகின்ற போது விளையாட்டை ரசித்து ஓலம் எழுப்புவதில் என்ன வஞ்சனையோ தெரியவில்லை, மாறாக இந்தி விளையாட்டு வீரர்கள் சிறப்பாக விளையாடும்போது மட்டுமே கரவொலி எழுப்பி தங்களது ஆதரவை பதிவு செய்யும் விதம் வெட்ககேடாக தெரிகிறது. கிரிகெட்டு விளையாட்டில் கூட இதே விதமான அரசியலை வெகு சகஜமாக காண முடிகிறது.


அயல் நாடுகளில் மக்கள் விளையாட்டுகளின் மீது வெறிகொண்டு ஒருவரையொருவர் தாக்கிக்கொள்ளுவது என்பது பிரேசில் அர்ஜெண்டினா போன்ற நாடுகளுக்கு இடையேயான கால்பந்தாட்ட மைதானத்தில் காண முடியுமே தவிர உலகில் இந்திய ரசிகர்களைப்போல [வெறியர்களை] வேறெங்கும் காணவே இயலாது. வாழ்க்கையில் எதிலுமே ஒரு வெறியோடு செயல்படுவது இந்திய நாட்டில் அதிகம் என்பதற்கு உதாரணங்கள் நிறைய உண்டு, வரதட்சிணை கொடுமை, நிலத்திற்காக சொத்துக்காக ஒருவரையொருவர் வெட்டி கொலை செய்துவிட்டு ஜெயிலுக்கு போவது என்பன போன்ற மூர்க்கத்த்தனங்கள், ஜாதிக்கொடுமை, மதக்கொடுமை போன்ற வெறித்தனங்கள் நிறைந்து காணப்படும் நாகரீகமற்ற சமுதாய வளர்ச்சியை கொண்டுள்ளது இந்திய தேசம்,

காமன்
வெல்த் விளையாட்டுகளில் சில நாடுகளுக்கு தங்கப்பதக்கம் அணிவிக்கின்ற நிகழ்வின் போது அந்நாட்டு தேசிய கீதம் இசைக்கும் சப்தம் கேட்பதே இல்லை, இந்திய வீரர்கள் தங்கப்பதக்கத்தை வென்ற பின்னர் நாட்டு பண் இசைக்கும்போது அதனுடே அந்த பாட்டை பாடுவதற்கு அறிந்திராதவர் போல நிற்ப்பதை காணுகின்ற போது நாட்டுப்பண் அவருக்கு தெரியவில்லையா அல்லது பாட வேண்டிய அவசியம் இல்லை என்பதற்காக வாயடைத்து நிற்கின்றாரா என்பது தெரியவில்லை. தேசிய கீதம், தேசிய கொடி போன்றவற்றிற்கு எத்தகைய மரியாதை செலுத்தப்பட வேண்டும் என்பது இளைஞர்கள் எத்தனை பேர் அறிந்திருப்பார்களோ தெரியவில்லை, பழைய காலத்தில் திரையரங்குகளில் திரைப்படம் முடிந்தவுடன் தேசியகீதம் இசைக்கப்படும் அப்போது அனைவரும் ஒருமித்து எழுந்து நின்று அதற்கான மரியாதையை அமைதியுடன் செலுத்திய பின்னரே வெளியேறுவார்கள், ஆனால் தற்காலத்தில் திரைப்படங்கள் முடிந்த பின்னர் தேசிய கீதம் இசைக்கப்படுவதும் இல்லை. தேசிய கீதத்தின் அர்த்தம் என்னவென்பது இன்றைய படித்த இளைஞர்கள் அறிவார்களா என்பதும் சந்தேகமே, அந்த பாடலை மனனம் செய்து வைத்திருக்கின்றனரா என்பது யாருக்கு தெரியப்போகிறது, ஏனென்றால் எல்லா இடங்களிலும் இசைத்தட்டிலேயே தேசிய கீதம் இசைக்கப்பட்டு விடுகிறதே. பாடும் வாய்ப்புகளே கிடையாதே.




10/03/2010

எங்கே மனிதன்

எனக்கும் என் நண்பனுக்கும் ஒரு சிறு போட்டி, எங்கெல்லாம் மக்கள் வசீகரிக்கப்படுவார்கள் என்பது பற்றி, மூன்று பேர் ஒருவர் ஒரு மூட்டை அரிசி, இன்னொருவர் இலவசமாக திரைப்படம் திரையிடும் கருவிகள், மூன்றாமவர் இலவச அருள் வாக்குகள் கூறி இலவசமாக வியாதிகளை சுகப்படுத்துபவர். மூவரும் வெவ்வேறு கிராமங்களுக்கு ஒவ்வொரு நாள் சென்று எடுத்துச்சென்றவற்றை இலவசமாக கொடுப்பதாக அறிவித்தோம், அதை கேள்விப்பட்ட மக்கள் கூட்டம் கூட்டமாக வந்து இலவசத்தை பெற்றுச் சென்றனர், அடுத்தமுறை அதே பொருட்களை மிகவும் குறைவான விலையில் கொடுப்பதாகக்கூறினோம், கூட்டம் முதல் முறையைவிட பாதியாக குறைந்தது, அடுத்த முறை சில காரணங்களைக் கூறி உதவித்தொகை அல்லது பொருளுதவி கேட்டுசென்றோம். ஒருவர் கூட கொடுப்பதற்கு முன்வரவில்லை.

இதில் ஒரு விஷயம் நன்கு விளங்கியது, இலவசமாக கிடைக்கும் என்றால் ஏழைகள் மட்டுமில்லாமல் சற்று வசதியுள்ளவர்கள் கூட இலவசப் பொருட்களை பெற்றுச் சென்றனர், உதவி என்று கேட்டு சென்ற போது வசதி படைத்தவர்கள்கூட உதவி செய்வதற்கு முன்வரவில்லை. மக்களின் ஒட்டு மொத்த உணர்வும் இலவசமாக கிடைப்பதை பெறுவதில் எந்தவித தயக்கமும் இன்றி பெற்றுக்கொள்ளச் செய்கிறது, அதே போன்ற உதவியை திருப்பி செய்வதற்கு சுயநலம் இடம் கொடுப்பதில்லை. இன்னொரு சோதனையில் மூவரும் ஜன நடமாட்டம் மிகுந்த கடைவீதியில் கூடி நின்று ஏதோ நடக்கக் கூடாத அசம்பாவிதம் நடந்துவிட்டது போன்ற பரபரப்பை ஏற்ப்படுத்திய போது மக்கள் அந்த சம்பவம் என்ன என்று அறிந்து கொள்வதற்கு வேகமாக கூட்டம் கூடினர்.

ஆடு மாடு யானைகள் போன்ற விலங்கினங்கள் ஒன்று நடந்து போகின்ற பாதையிலேயே மொத்த கூட்டமும் பின்பற்றுவதைப்போல மனிதர்கள் ஒருவர் செய்வதைப்போல அல்லது ஒருவர் போகின்ற போக்கிலேயே மற்றவர்களும் செல்வது கூட பல சமயங்களில் காணப்படுகின்ற செயலாக உள்ளது. சிறுவயதில் படித்த குல்லா வியாபாரியும் குரங்குகளும் என்ற கதை நினைவிற்கு வருகிறது. எங்காவது பணமோ நகையோ வேறு பொருட்களோ கிடைத்துவிட்டால் அதை கையில் எடுத்த பின்னர் 'பாவம் யாருடையதோ, இதை தொலைத்துவிட்டு வருத்தத்தில் என்ன செய்கின்றாரோ' என்று எத்தனை பேரால் நினைக்க முடிகிறது. யாரோ ஒருவரின் உடமையாக இருந்தாலும் தனது கைக்கு வந்து சேர்ந்ததில் மகிழ்வுறும் மனிதர்களை நம்மால் பார்க்க முடிகிறது, கிடைத்த பணத்தையோ நகையையோ மற்ற உடமைகளையோ எடுத்துச் சென்று காவல்துறையிடம் ஒப்படைக்க வேண்டுமென்று எங்கோ ஒரு சிலர் செய்வதால்தான் அவரை ஊடகங்களில் செய்திகளில் வெளிச்சம் போட்டு காண்பிக்கின்றனர், அத்தனை அபூர்வமான செயல்.

பல பொருட்கள் காவல் துறையிடம் ஒப்படைக்கபட்டும் கூட அப்பொருளை இழந்தவரின் கைகளுக்கு சென்று சேருகிறதா என்பதும் சந்தேகம்தான். அடுத்தவருடைய உடமைகள் எதுவாக இருப்பினும் அதை இலவசமாக எடுத்துக் கொள்வதில் மனித மனம் திருப்தியடைவது ஏன், அதே சமயம் தன்னுடைய உடமைகளை இழக்கின்ற சமயத்தில் அல்லது தொலைத்துவிடுகின்ற சமயத்தில் நாம் படுகின்ற துன்பத்திற்கு அளவே இருப்பதில்லை என்பதை நாம் சிந்திக்க மறுப்பது ஏன். இத்தகைய சுயநலம் மனிதர்களுக்கு அங்கொன்றும் இங்கொன்றுமாக காணப்படுகிறதா அல்லது அதிகபட்சமாக காணப்படுகிறதா என்பதை நாம் யாவரும் நன்கு அறிவோம், அடுத்தவரின் உடமைகளுக்கு ஆசைப்படாத மனிதர்கள் மிகவும் குறைவா, அல்லது அதிகமா, அதில் நாம் எந்த ரகத்தை சேர்ந்தவர்கள்?

கோவிலின் வாசலில் கழற்றிவிட்டுச் செல்லும் புதிய காலணிகளைக் கூட விடுவதில்லை, அப்படியொரு காலணி திருடித்தான் அணிந்துகொள்ள வேண்டுமென்றால் அதைவிட வெறும் காலிலேயே நடந்து செல்வது மேன்மை என்பதை அறிந்திருக்கவில்லையா, 'எனக்கு வேலை கிடைக்கவில்லை, போதிய வருமானமில்லை, பட்டினி பசி' என்று கூறுகின்ற போது அடுத்தவரின் உடைமைகளின் மீது கவர்ச்சி உண்டாவது தவிர்க்க இயலாததா, அதைவிட இறந்து போதல் உத்தமம் அல்லவா. சொகுசு வாழ்க்கை பழகி போச்சு என்பதால் உடலை விற்கும் வியாபாரம் செய்தாவது அந்த வாழ்க்கையின் வசதிகளை தொடர, அப்படி சொகுசுகளில் வாழ்ந்த உடலில் பெயர் சொல்ல இயலாத வியாதிகள் வந்து மடிவதைவிட அதற்க்கு முன்பே மடிவது மேன்மையல்லவா.

மனிதன் என்றால் என்ன, பகட்டும் வசதிகளும் சுக போகங்களும் நிரம்பியதா, அப்படி இல்லாத மனிதன் பாவப்பட்ட ஜன்மமா, எதையும் எவ்வாறேனும் அடைந்து விடுவது மட்டுமே வாழ்க்கையின் வெற்றியா, வெற்றி தோல்விகள் என்பது பணம் மற்றும் புகழை எவ்வாறேனும் அடைந்து விடுவதில் உள்ளதா. அவ்வாறு அடைய இயலாதவர்கள் மனிதர்கள் இல்லையா, பூமியில் பிறப்பதே சுகமாக
வாழ்க்கையை வாழ்ந்துவிடுவதற்க்காக மட்டும்தானா.


10/02/2010

அமெரிக்க அதிபர் திரு பாரக் ஒபாமா அவர்களுக்கு,


அமெரிக்க அதிபர் திரு பாரக் ஒபாமா அவர்களுக்கு,

இந்திய மக்களின் சார்பில் எனது அன்பும் வணக்கமும் உங்களுக்கும் உங்கள் நாட்டு மக்களுக்கும், உங்களது இரண்டு பெண் குழந்தைகளுக்கு எனதுமுத்தங்களும் உங்கள் மனைவிக்கு எனது அன்பும் இந்த கடிதத்தின் மூலம் தெரிவித்துக்கொள்ளுகிறேன், உங்களுக்கு தமிழ் படிக்க தெரியாவிட்டாலும் தமிழ் நாட்டைச் சேர்ந்த பலரை அமெரிக்காவில் தினம் தினம் பார்க்கவும் பழகவும் கூடும், உலகின் மூலைமுடுக்குகளுக்கெல்லாம் கூட கணினியும் ஊடக வசதிகளும் பெருகி வருகின்ற காரணத்தால் அமெரிக்க அதிபராகிய உங்களுக்கு கடிதம் எழுதுவதற்கு கூட வாய்புகள் தற்காலத்தில் தொழில் நுட்பத்தின் முன்னேற்றம் நமக்கு வழங்கி இருப்பது மிகவும் சிறப்பானது.

சில ஆண்டுகளுக்கு முன்னர் கருப்பு இனத்தவர்களை வெள்ளைக்கார மண்ணில் அடிமைகளாய் வேலையாட்களாய் பழக்கபட்டிருந்த காலம் மாறி வெள்ளை மாளிகையில் ஜனநாயக முறையில் தேர்வாகி அதிபர் பதவியை பெற்றிருக்கும் உங்களுக்கு எங்களது வாழ்த்துக்கள், அமெரிக்காவின் பொருளாதாரம் சீர் குலைக்கப்பட்ட சதியிலிருக்கும் சமயம் நீங்கள் அந்நாட்டு அதிபராக பொறுப்பேற்றது மிகவும் சாலேஞ்சிங்கான வேலை. நாட்டு மக்களுக்கு பொருளாதாரத்தை உயர்த்துவதர்க்கான திட்டங்களை வகுத்து நடைமுறைப் படுத்துவதும் எதிரிகளிடமிருந்து நாட்டையும் மக்களையும் இன்னும் பல இழப்புகளிலிருந்து காக்கவும் தகுந்த நடவடிக்கை மேற்கொள்வதோடு அவற்றை நடைமுறை படுத்த போதுமான பணபலத்தை மேம்படுத்துவது என்பது லேசான காரியம் இல்லை.

சமீபத்தில் செய்திகளில் நீங்கள் சொன்ன கருத்து ஒன்றைப் பற்றி இங்கு குறிப்பிட விரும்புகின்றேன், அதாவது தற்போதைய இந்திய நாட்டின் படித்தவர்களது எண்ணிக்கை பன்மடங்கு உயர்ந்திருப்பதை அமெரிக்காவுடன் ஒப்பிடும் போது அமெரிக்காவில் கல்வியை கற்றவர்களது எண்ணிக்கை கணிசமாக குறைந்திருப்பதை சுட்டிக்காட்டி எதிகால அமெரிக்காவில் படித்தோர் அதாவது கல்வி கற்றவர்களின் எண்ணிக்கை மிக குறைவடையும் நிலை உருவாகும் என்று கவலை தெரிவித்திருந்தீர்கள், இந்தியாவை பொறுத்த மட்டில் கல்வி க
ற்ப்பது என்பது தனி மனித பொருளாதாரத்தை, அந்தஸ்த்தை, தேவைகளை உயர்த்திக் கொள்வதற்கு மட்டுமே, மிகவும் முக்கியமான முதலீடாக கருதப்படுவதாலேயே, கல்வி கற்ப்பவர்களின் தொகை கணிசமாக உயர்ந்து வருகிறது என்பதையும் உங்கள் நாட்டைப்போல தங்களுக்கு பிடித்த கல்வியை அல்லது தங்களது ஆர்வத்திற்கு ஏற்ற வேலையை தெரிவு செய்து அதை கண்ணும் கருத்துமாக இறுதி வரையில் செய்து முடிப்பவர்கள் எங்கள் நாட்டில் எண்ணிக்கையில் கோடியில் ஒருவராக இருப்பது கூட கடினம் என்பதை நீங்கள் அறிந்திருக்க வாய்ப்பு இல்லை.

கல்வி என்பது இங்கே பொருளீட்டும் கருவியாக இருப்பதினாலே எந்த துறையை சார்ந்த படிப்பை படித்தால் அதிக வருமானம் ஈட்ட முடியுமோ அந்த கல்வியை டொனேஷன் என்ற பெயரில் பெரும் தொகையை கல்வி ஸ்தாபனங்கள் வசூலித்தாலும் வங்கியிலோ கந்து வட்டியாகவோ கடனை பெற்றாவது குறிப்பிட்ட கல்வியை படிக்க தங்கள் பிள்ளைகளை சேர்த்து படிக்க வைக்கும் நிலை வேரூன்றி எங்கும் காணப்பட்டது, சமீப காலமாக அரசு நிர்ணயித்த கட்டணத்தை வசூலிக்கும் கல்வி ஸ்தாபனங்களைத் தவிர அதிக கட்டணம் வசூலிக்கும் கல்வி நிலையங்களின் மீது மக்கள் கூட்டம் கூடி எதிர்த்து அந்த நிறுவனத்தின் மீது நடவடிக்கை எடுக்க கோரிக்கை வைக்கும் புதிய மாற்றம் ஒன்று செய்திகளில் கடந்த சில மாதங்களாக வெளியாகி வருகிறது, இந்த நிலை வேறு என்ன விதமான மாற்றங்களை அடையப்போகிறது என்பதை பொறுத்திருந்துதான் பார்க்க வேண்டும்.

வேலை கிடைக்கும் வரையில் ஒவ்வொரு நிறுவனமாக ஏறி இறங்கி அந்த நிறுவனங்களில் பணியாற்றுகின்ற துப்புரவு தொழிலாளி தொடங்கி எந்த பணியில் இருப்பவராக இருப்பினும் அவர்களுக்கு மரியாதையோ மரியாதை என்று அள்ளி அள்ளி கொடுப்பவர்கள், லஞ்சம் என்கின்ற அன்பளிப்பை எந்த வகையிலெல்லாம் கொடுக்க முடியுமோ அப்படியெல்லாம் வாரி வழங்கி, காலையில் அலுவலகத்தை திறப்பதற்கு முன்பே அதன் வாசலில் மணிக் கணக்காய் காவல் நின்று வேலைக்கான உத்தரவு கையில் கிடைத்து பணி நிரந்தரம் ஆகும் வரையில் 'இந்த பூனையும் பால் குடிக்குமா' என்பது போல உங்கள் ஊரில் இருக்கும் ஹாலிவுட் நடிகர்களை தோற்கடிக்கும் விதத்தில் நிஜ வாழ்க்கையில் அபாரமாக நடித்து பணி நிரந்தரத்திற்கு பின்னர் நீங்கள் பார்க்க வேண்டுமே, அடடா என்ன இருந்தாலும் இந்தியர்களின் அபார தொழில் டெடிகேஷனை,

நீங்கள் அமெரிக்காவில் பார்க்கும் இந்தியர்களை மனதில் வைத்துக் கொண்டு எல்லாரையும் ஒரே மாதிரி நினைத்துவிடாதீங்க, டாலருக்காகவும் ஆடம்பர வாழ்க்கைக்காகவும் உங்கள் சட்ட திட்டங்களை கை கொண்டு ஒழுங்காக வேலை செய்வார்கள் இல்லையென்றால் சீட்டை கிழித்திடுவாங்களே; ஆனால் தங்கள் சொந்த நாட்டில் ஒவ்வொருவரும் குறுநில மன்னர்கள்தான். எங்கள் நாட்டிற்கு நீங்கள் வருகை தரவிருப்பதாக செய்தி ஒன்றில் படித்த ஞாபகம், அப்படி இங்கே வந்தால், வேண்டுமென்றால் மாறுவேடம் போட்டுக்கொண்டு அரசு அலுவலகங்களை ஒரு பார்வையிடுங்களேன், அப்போது தெரிந்துவிடும் உங்களுக்கு. ஒவ்வொருவருக்கும் எத்தனை தொழில் விசுவாசம் உள்ளது என்பது,
ன்னும் நிறைய எழுத இருந்தாலும் உங்கள் பொன்னான நேரத்தை வீணடிக்க விருப்பமில்லை என்பதால் இங்கு தற்போது முடித்துக் கொண்டு பிறகு இன்னொரு சந்தர்ப்பத்தில் மீண்டும் உங்களுக்கு கடிதம் எழுதுவேன் என்பதை தெரிவித்துக்கொள்கிறேன்.

இதுவரையில் நான் எழுதிய இந்த நீண்ட கடிதத்தை நீங்கள் உங்களது வேலைகளுக்கிடையே பொறுமையுடன் படித்ததற்காக நன்றி, மீண்டும் உங்கள் நாட்டு பிரஜைகளுக்கும், மனைவி மற்றும் இரண்டு குழந்தைகளுக்கு எனது அன்பும் வணக்கமும் உங்களுக்கு எனது நன்றியையும் பாராட்டுகளையும் தெரிவித்துக் கொள்ளுகிறேன்.

மிக்க நன்றி, வணக்கம்'

இப்படிக்கு,
ரத்னா
இந்திய பிரஜை.

கேள்விக்கு என்ன பதில்

1. அலஹாபாத் நீதிமன்ற தீர்ப்பு மக்களிடையே விரோத போக்கை அதிகரிக்காமல் ஜனநாயக ரீதியில் மிகவும் நேர்மையானதாகவே இருந்தது

1. மிகவும் சரி

2. மிகவும் தவறு

3. உச்சநீதிமன்றத்தில் மேல் முறையீடு செய்யவிருப்பதால் தாக்கம் அதிகரிக்கவில்லை

4. சட்டம் ஒழுங்கு சரியான முறையில் அமலில் இருந்ததால் குழப்பங்கள்
ஏற்ப்படுவதை தவிர்க்க முடிந்தது


2. இன்றைய இளைஞர்கள் மதத்தின் மீதும் அவற்றை சார்ந்த கலவரங்களிலும் ஈடுபடுவதில் ஆர்வத்துடன் இல்லை

1. மிகவும் சரி

2. மிகவும் தவறு

3
. சரியான சமயத்தில் கலவரங்களில் கலந்து கொள்வார்கள்

4. கலவரங்கள் வாழ்க்கைக்கு அவசியமற்றது என்பதால்



3. காமன் வெல்த் விளையாட்டு போட்டிகள் இந்தியாவில் நடத்தப்படுவதில்

1. எனக்கு சிறிதும் உடன்பாடு கிடையாது இதற்க்கு காரணம்

2
.
இந்தியாவை மற்ற நாடுகளுடன் இணைக்க விருப்பமில்லை

3
. வேறு நாடுகளின் வீரர்கள் வெற்றி பெறுவதை பார்க்க பிடிக்கவில்லை

4
. ஆளும் கட்சிக்கு மேலைநாடுகளில் நல்ல பெயர் கிடைப்பது பிடிக்கவில்லை


4. எந்திரன் திரைப்படம் முதல் நாள் பார்ப்பது


1. என் வாழ்க்கையின் குறிக்கோள்

2. ரஜினிகாந்திற்காக எத்தனை முறை வேண்டுமானாலும் பார்ப்பேன்

3. ஷங்கர் மற்றும் ரகுமானுக்காக எத்தனை முறை வேண்டுமானாலும் பார்ப்பேன்

4. யாருக்காகவும் அல்ல திரைப்படம் முதல் நாள் பார்ப்பது எனக்கு பிடிக்கும்




10/01/2010

எனக்கு நடிக்க ஆசை !!!!

நெடுங் காலமாக ஒரு ஆசை என்னை விடாமல் துரத்தி வருகிறது, சூழ்நிலைகளின் காரணமாக சில காலம் அடங்கி கிடக்கும் அந்த ஆசை திடீரென்று பேயாய் கிளம்பி சுனாமி ஆழி அலைகளைப்போல் என்னை உரு தெரியாமல் வேரோடு பிடுங்கிக்கொண்டு சென்று நான் அறியாத ஏதோ ஒரு பகுதியில் பிணமாக கிடத்திவிடுவதுண்டு. அப்போதுதான் நான் பல உண்மைகளை முதன் முதலாக உணர்ந்தேன், அதுதான் பரம்பரை எண்ணங்கள், பரம்பரை வியாதிகளைப்போல, பரம்பரை பரம்பரையாக தானாகவே ஏற்ப்படுகின்ற கலைகளின் மீது ஆசைகள். காதலைக் கூட என் மதியால் வென்றதுண்டு ஆனால் இந்த கலையார்வத்தை என்னால் மாற்றிக்கொள்ளவே இயலாமல் போனதன் காரணம்,

என் பெற்றோர் மூலம் மரபணுக்களின் மூலமாக என் உடலினுள் புகுந்து அதன் வீரியம் கிளம்பும்போதெல்லாம் எவ்வாறெல்லாம் ஆட்டி படைக்கும் என்பதை நான் நன்றாகவே உணர்ந்தேன், இந்த ஒரு ஆசையை மட்டும் என்னைவிட்டு என்னால் அகற்றவே முடியாதபடி என்னை முழுவதுமாக தன் பிடிக்குள் இறுகப்பிடித்து வைத்திருக்கும் ராட்சசனுக்கு, அடிப்படை காரணம் எனது பெற்றோர்தான். என் அப்பா கலை கலை என்று சித்தம் கலங்கியவரைபோல சுற்றி அலைந்தபோது அதற்க்கான முழு வீச்சு என்னவென்பதை என்னால் முழுவதுமாக உணர இயலாமல் போனது, அவர் மறைவிற்கு ஓரிரு வருடங்களுக்கு முன்னர் தான் என்னுள் அதுவரையில் உறங்கி கிடந்த இந்த கட்டுக்கடங்கா ஆர்வம் தலை தூக்க ஆரம்பித்தது.

எனது அப்பா அடிக்கடி சொல்வது எனக்கு ஒரு மகன் பிறந்தால் அவன் மூலம் என் கனவுலகை நான் நிச்சயம் காண்பேன் என்று, நான் பெண்ணாக பிறந்தது அவரது கலையார்வம் முழுமை பெறாமல் போக காரணமானது. என் அம்மாவும் சிறந்த கலையார்வமும் தேர்ச்சியும் பெற்றிருந்தும் முழுமையடையாமல் போன கலையார்வம், இந்த இருவருக்கும் பிறந்த எனக்கு மட்டும் அதுவரையில் உறங்கி கிடந்த அந்த ராட்சசன் அவர்களது மறைவிற்கு சற்றே முன்னர் விழித்துக் கொண்டபோது அதை அறிந்த எனது பெற்றோர் திகிலடைந்தனர், ஏனென்றால் அதற்கான முயற்ச்சிகளை மேற்கொள்ளவதற்காக நான் கிளம்புகின்ற போது என் தகப்பனார் அந்த பாதை மிகவும் மோசமானது, குடும்ப பெண்களுக்கு ஆகாதது என்று பலமுறை எடுத்துரைத்தார்.

அவர் கூறியதிலிருந்த உண்மை அப்போது எனக்கு விளங்கவில்லை நான் சென்ற ஒவ்வொரு இடங்களிலும் அதன் தாக்கத்தை என்னால் நன்கு உணர முடிந்தது, தெருவில் ஓடிக்கொண்டிருக்கும் நாய்க்கு குடிப்பதற்கு தண்ணீரோ ஆகாரமோ அல்லது உறங்குவதற்கு சரியான இடமோ தேவைப்படும் என்றாலும் அந்த நாயின் ஓட்டம் அதற்க்கு தேவையான இவைகள் கிடைக்கின்ற இடத்தை நோக்கித்தான் ஓடுகின்றனவா என்பது அவைகளுக்கு தெரியாமலேயே அங்குமிங்கும் ஓடிக்கொண்டிருப்பது போல கலையார்வமிக்க மனநிலையில் அதை எப்படியாவது அடைந்துவிடுவதென ஓடுகின்ற ஓட்டமும் அதே நிலைமையை நினைவுபடுத்துவதாக உள்ளது, அவ்வாறு இங்குமங்கும் ஓடுகின்ற போது இடையே கிடைக்கின்ற வேற்று நாய்களின் கடிகளும் குதறல்களும் மனிதர்களின் கல்லடிகளும் வாகனங்கள் அதன் மீது ஏறி நசுங்கி இறந்து போகின்ற சம்பவங்களும் சில சமயம் கிடைக்கும் ஆகாரமும் இதைத்தான் 'நாய் பிழைப்பு' என்பார்களோ என்று எண்ண வைக்கும்.

திறமை உள்ளவர்களுக்கு வாய்புகள் கிடைக்கின்றதா கிடைக்கின்ற வாய்ப்புகளை திறமையுடன் பயன்படுத்துபவர்கள் முன்னேறி வெற்றி பெறுகின்றார்களா, இடையில் அதிஷ்டம் என்ற ஏதோ ஒன்றை எல்லாரும் உச்சரிக்கின்றார்களே அந்த அதிஷ்டம் எங்கிருந்து எப்படி கிடைக்கிறது அது எவ்வாறு தன் வேலையை செய்கிறது என்பது தெரியவில்லை. எண்கள் எழுத்துக்களை கண்டு பிடித்தவன் மனிதன், பின்னர் வார, மாத, வருட கணக்குகளை கண்டு பிடித்தவனும் மனிதன், இதில் எப்படி ஒருவருடைய பிறந்த தேதியில் உள்ள எண்கள் அதிஷ்டம் உள்ளனவாகவும் துரதிஷ்டம் உடையனவாகவும் இருக்க முடியும் என்பதை விளங்கிக் கொள்ள முடியவில்லை, அதே போல எழுத்துருவை அதாவது மொழியை கண்டு பிடித்த மனிதன் அதற்கான இலக்கண இலக்கியங்களையும் கண்டுபிடித்து தன் கற்பனையில் எழுதியும் வைத்தான் இவ்வாறிருக்க ஒருவரின் பெயரில் எப்படி அதிஷ்டம் ஏற்ப்பட முடியும்.

நம்புகின்றவர்களுக்கு உள்ளதென்பதும் நம்பாதவருக்கு இல்லை என்பதுமே முடிவாக உள்ளது. நடிப்பதற்கும் வாய்புகள் கிடைப்பதற்கும் அதிஷ்டம்தான் காரணம் என்றால் மற்ற எல்லோருமே அதிஷ்மில்லாதவர்கள் என்பதல்லவா அர்த்தம். அது போகட்டும், நடிக்கவேண்டும் என்கின்ற வெறி ஏற்ப்பட்டுவிட்டால் அதற்க்கு இடையுறாக எதையுமே எண்ண முடியாத வெறியை அல்லது போதையை ஏற்ப்படுத்துவது எது, அறிவையும் சுய கவுரவத்தையும் மறந்து எப்படியாவது அடைந்துவிடவேண்டும் என்கின்ற நெருப்பை உண்டாக்குவது எது, அதனால் இழப்புகள் ஏராளம் என்றாலும் அடங்கா தாகத்தைக்கொடுப்பது எது. அது என்னுள் வந்தது எப்படி. ஆசைக்கு அளவில்லை என்பதுதான் இதுவா, எனக்கு புரியவில்லை, நடிக்க வேண்டும் என்பது தீராத ஆசை ஆனால் எனக்கு நடிக்க தெரியாது, எனக்கு அதிஷ்டம் இல்லை போலும், ஆனால் ஆசை என்கின்ற நெருப்பு அணைய மறுக்கிறது, நீ பெண் என்று தன்மானம் தடுக்கிறது ஆனாலும் நடிக்க ஆசை, அது என்னை துரத்துகிறது இதற்க்கு நான் காரணமா, இல்லையே, மரணத்தை வெல்ல இயலாதது போல் இந்த உணர்வையும் வெல்ல இயலாது,

ஆம், மரணத்தை யாராலும் வெல்ல இயலாது, அதற்க்கு காரணம் மனிதனால் வெல்ல இயலாத எண்ணங்களையும் செயல்களையும் மரணத்தின் மூலம் அழித்துவிடலாம் என்பதனால் மரணத்தை யாராலும் வெல்ல இயலாது.

யாரேனும் எனக்கு நடிக்க வாய்ப்பு கொடுங்களேன், ப்ளீஸ்!!