Translate

10/26/2009

கோவிலில்லா ஊரில்....


ஆகஸ்ட்டுமாத இறுதியும் செப்டம்பர் மாதமும் கோவில்களில் திருவிழாக்கள் என்பதால் கோவில் அமைந்திருக்கும் தெருக்களிலோ வீதிகளிலோ அலங்காரங்களும் அலங்கார விளக்குகளும் ஒலி பெருக்கிகளும் காணப்படுவது நாளுக்கு நாள் அதிகரித்து காணப்படுகிறது, தடை செய்யப்பட்ட பழைய ஒலி பெருக்கிகளையே தற்ப்போதும் பயன் படுத்தி வருவதால் சத்தம் காதை பிளந்து விடும் போன்றுள்ளது, கோவில்களை அடுத்திருக்கும் குடி இருப்புகளில் குடி இருப்போரும் தெருவை கடந்து செல்லும் வாகனங்களும் ஒலி பெருக்கியிலிருந்து வரும் அதிக பட்ச சத்தத்தினால் பெரிதும் பாதிக்கப்படுவது சகஜம். இதனால் சில இடங்களில் விபத்துக்களும் ஏற்ப்படுகிறது.

சிறிய குழந்தைகள் மற்றும் வயதானவர்கள் மற்றும் உடல் நலமில்லாதவர்களை இந்த ஒலிபெருக்கியின் சத்தம் இம்சைப்படுத்தி வருவதோடு நில்லாமல் உடல் நலக் குறைவை அதிகப்படுத்துவதாகவே உள்ளது , வீட்டிலிருக்கும் தொலைபேசியின் அழைப்பு மணியோசை கேட்காமல் பல தொலைபேசி அழைப்புகள் சத்தத்தின் மிகுதியால் நிராகரிக்கபடுவதும் வாடிக்கை, இப்படி பல பாதிப்புகளை ஏற்ப்படுத்தும் ஒலிபெருக்கிக்கு மின்சாரம் தெருவிளக்கிற்கு கொடுக்கப்பட்டிருக்கும் மின்சாரத் தொடர்பிலிருந்து எடுக்கபடுவதாக கூறப்படுகிறது.

அந்த காலத்தில் ஒரு பழமொழி உண்டு, 'கோவிலில்லா ஊரில் குடியிருக்க வேண்டாம் ' என்று, ஆனால் கோவில் திருவிழாக்கள் பெரும்பாலும் தெருவிழாக்களைப்போல நடத்தப்படுவதால், திருவிழாக்களின் போது பயங்கர சத்தம் ஏற்ப்படுத்தக்கூடிய வெடிகளை இரவு 10 மணிக்கு மேல் வெடித்து குலை நடுங்க வைப்பதாலும், 'கோவில் இல்லாத ஊரில் குடி இருப்பதே' சிறந்ததாக இருக்கும் என்ற நிலை உருவாகி வருகிறது.